Paarlattaasartunik tikisitseqqittalernissaq pisariaqartippaat

Dronning Ingridip Napparsimmavissuani peqqissaasut nungulermata, peqqissaasunik paarlattaasartunik tikisitsinissaq maanna pisariaqartinneqalerpoq. Immikkoortortat ilaanni peqqissaasut arfinillit uninngasunik 30-t tungaanut amerlassusilinnik isumaginnittarput.

- Nuanninngilaq, Immikkoortortami K2-mi peqqissaasoq Naja Kriegel oqarpoq.

Dronning Ingridip Napparsimmavissuani peqqissaasut nungulermata, peqqissaasunik tikisitsinissaq maanna pisariaqartinneqalerpoq. Pissutsillu sulisunit naamamgineqarunnaarput.

- Nuanninngilaq, pisariaqartitsisuinnaat unitsinneqartalernikuupput, taakkualu aamma amerliartorput, sulisut ikittuinnaalluta isumagisarpagut, Naja Kriegel oqarpoq.

Sipaarniarneq pissutaalluni Dronning Ingridip Napparsimmavissuanut peqqissaasunik paarlattaasartunik tikisitsisoqartarunnaarpoq, immikkoortortat matuneqarlutik kiisalu pisariaqartitsisuinnarnik unititsisoqartarluni. Tamatuma kingunerisaanik uninngasut ilaat torsuusani inissinneqartaput. Napparsimmavissuarmi sulisut pissutsit naammagiunnaarlugit ullaaq ataatsimeeqatigiipput, Nakorsaanerup Knud Erik Kleistip iliuuseqartoqarnissaa ujartorpaa.

- Pissutsit ima ajortigipput, napparsimmavissuaq matoqqajaavoq, Nakorsaaneq Knud Erik Kleist oqarpoq. Napparsimmavissuarmi peqqissaasoqanngippat napparsimasut unitsinneqarsinnaanngillat, arlaannillu iliuuseqartoqarnissaa anguniarlugu qullersat ataatsimeeqatigineqarput. Peqqissaasut paarlattaasartut tikisinneqarnissaat maanna pisariaqartinneqalerluni

Napparsimavissuarmi peqqissaasut pisortaata Maybritt Andersenip iliuuseqartoqarnissaa isumaqatigaa.

- Ataavatumik sulisussanik pissarsiortarpugut, tarnikkut nappaateqartunut immikkoortortami tamanna iluatsilersutut oqaatigisinnaavara, pilatsinneqartulli immikkoortortaanni tamanna iluatsinngilaq, tassanilu peqqissaasunik paarlattaasartunik tikisitsisariaqarpugut, peqqissutsimullu naalakkersuisoqarfik tamanna pillugu ullormut attaveqartarpugut, Maybritt Andersen Radioaviisimut oqarpoq.

Ataavartumik peqqissaasunik sulisoqalissappat akissarsiat aaqqiivigineqartariaqartut kiisalu politikkerit peqqissaasut atugarisaannut eqqumanerulertariaqartut peqqissaasunit tikkuarneqarput.