Paarlaasseqatigiittarnissaq isumaqatigiissutigaat

Kræftertut Islandimi katsorsarneqartalissapput, nakorsanillu sulisunillu allanik paarlaasseqatigiitoqartalernissaa isumaqatigiissutigineqarluni.
Allattoq Mads Lynge
septembarip 08-at 2007 13:26

Napparsimasut katsorsarneqarnissaannut tunngatillugu Savalimmiut Islandillu akornanni isumaqatigiissusiortoqarnialerpoq. Savalimmiormiut Danmarkiliaratik Islandiliartalernissaat siunniuneqarpoq.

Nutaarsiassaqartitsivimmi Ritzau-imi taama allaaserinnittoqarpoq.

Kræftertut katsorsarneqartalernissaat pingaarnertut isumaqatigiissutigineqassaaq.

Savalimmiuni inunnik isumaginninnermut peqqinnissamullu naalakkersuisup Hans Pauli Strømip oqaasii naapertorlugit kræftertut Islandimi katsorneqartarnerat Danmarkimut naleqqiullugu pitsaanerusarpoq, katsortinnissamullu utaqqisarneq sivikinnerulluni.

Nakorsanik peqqinnissaqarfinnilu sulisunik allanik Savalimmiut Islandillu akornanni paarlaasseqatigiittoqartarnissaa takorloorneqarpoq.

Danmarkiliartitsisarnerit ukiumut 100 millioni koruuninik naleqartarput, amerlanerillu Rigshospitaliliartinneqartarlutik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq