Paarisa: Suliniutit sunniutaat piffissap ingerlanerata takutissavai

Imminut toquttarneq pillugu suliniuteqarnermi ataqatigiissaarisoq, Jette Eistrup, Paarisa, oqarpoq naatsorsueqqissaartarneq naapertorlugu pissutsit misinnartumik allannguuteqanngitsut.

- Ajoraluartumik oqaatigisariaqarpoq angutit inuusuttut 15-it 25-llu akornanni ukiullit imminnut toquttartut amerlanerussuteqartut. Taakkunanilu avannaani Tunumilu nunaqarfinneersut amerlanerupput.

- Soorunami paasiuminaappoq sooq imminnut toquttarnersut, kisianni kiserliorneq, ajornartorsiutillu pillugit oqaloqatissaaleqisarneq pissutaasinnaapput. Inuusuttummi amerlanerit ajornartorsiutitik pillugit oqaloqateqarnissartik, ingammik inersimasunik oqaloqateqarnissartik, tunuarsimaarfigisarpaat.

Inuusuttut taama misigisimasartut nalunngikkaluarlutigu, sorpiaat imminut toqunnissamut pissutaavissortarnersut eqqoriaannarsinnaavagut.

Ajornartorsiutit qanoq iliuuseqarfiginissaat periarfissaqartillugu oqaluuserisalernissaat ilikkarniartariaqarparput. Atuarfitsialammilu sammineqartut, akerleriitsilluni saammaateqatigiissinnaanerup siunnersuisarnerillu ukiuni makkunani ineriartortinneqarnerat, Jette Eistrupip nuannaarutiginerarpaa.

- Suliniutit tamakku assigiinngitsut sunniuteqarnersut aatsaat ukiut arlallit qaangiuppata takuneqarsinnaalissasoq, nunani allani misissuisarnerit takutippaat, Jette Eistrup oqarpoq.

Paarisamiit sinerissami pinaveersaartitsisut suleqatigineqarput.

Paarisami oqarasuaammik siunnersuiffiusinnaasumik ammaanikuuvugut, taaguuserlugu; Attavik 146.

Oqarasuaatikkullu siunnersuivik Attavik 146 pingasungornikkut arfininngornikkullu unnukkut nalunaaqutaq arfineq marlumiit qulip tungaanut ammasarpoq.