Paarisa: Oqaloqatigiinnerulertariaqarpugut
Nuna tamakkerlugu ukiormannaannaq imminorsimasut katillugit 13-iupput, kisitsisillu qimerluuataaraanni Kangaatsiaq maluginiagassaavoq. Kangaatsiap Kommuneani innuttaasut 1500-it missaanniipput, maannamullu pingasut imminorsimallutik. Imminortarnerlu pinaveersimatissagutsigu maannangaaq iliuuseqartariaqartugut oqaloqatigiinnerulertariaqartugullu, Paarisami suliniutinut ataqatigiissaarisoq Jette Eistrup oqarpoq:
- Kisitsisit qanorluunnit amerlavallaartutut taasariaqarput, imminornerit tamarmik alianartarmata. Paarisami suliniummik nutaamik imminortarnerit pinaveersimatinnissaannut tunngasumik ingerlatsisoq Jette Eistrup taama naliliivoq.
Nuna tamakkerlugu imminorsimasut pingajorarterutaasa missaanniittut Kangaatsiami pisimapput, imminorsimasulli taakku imminnut attuumassuteqanngitsut Jette Eistrupip erseqqissaatigaa.
Suna pillugu imminortoqartarneranik paasissutissannik pigisaqartoqanngilaq, taamaattorli ilisimaneqarpoq, amerlanerpaartaat meeqqat atuarfianni atuartuusut imaluunnit ilinniartuusut. Aamma ilisimaneqarpoq, angutit inuusuttut amerlanerpaasartut, taakkunanilu amerlanerpaartaat suliffissaaleqisuusarput, ilinniagaqarsimanatik suliffeqarfinnullu attuumassuteqarpiarnatik.
- Taamaattumik oqartoqarsinnaavoq, isumaginninnerup aningaasaqarnerullu tungaatigut atugarliorneq peqqutaaqataasartoq. Jette Eistrup oqarpoq.
Ilaqutariit eqqorneqartut sapinngisamik ikiorniartariaqartut erseqqissaatigaa, taamaaliornikkut qanigisaasut imminornissamik eqqarsaateqalersinnaanerat pinaveersimatinniarlugu.
Aammali imminornissamik eqqarsaatillit ikilisissagaanni inoqarfiit tamarmik pinaveersimatitsinissamik suliniuteqartariaqarnerarpai.
- Isertuanata oqaloqatigiinnerusariaqarpugut, suliniutit allat angusaqarfiulluassappata qanoq innitsinnik oqaloqatigiinnerusariaqalerpugut. Jette Eistrup oqarpoq.
Kangaatsiami suliniutit assigiinngitsut aallartereerput, ilaatigullu avataanit ikiuiartortunit upernaarmanna arlaleriarlutik tikinneqassallutik.
Siorna imminortut katillugit 49-pput, ukiormannalu 13-iullutik, agguaqatigiissillugu siorna taamaalineranit amerlanerulaarlutik. Nuummi agguaqatigiissillugu ikinnerpaapput, nunattali sinnerani amerliartuinnartut, Peqqinnissakkut Nakkutilliisoqarfik naliliivoq.
