PAARISA: malunnartitsiniaanermut peqataalluaritsi

Meeqqat timiminnut aalajangiisinnaassuseqarnerat pillugu oqariartuutip malunnartinniarneqarnerani Kalaallit Nunaanni meeqqat atuarfiini atuartut ilinniartitsisullu nuna tamakkerlugu ullumi nalunaaqutaq ataatsimut peqataaqqulluugit PAARISA-mit kajumissaarneqarput. Meeqqanik kinguaassiutitigut atornerluisarnerup pinaveersaartinneqarnissaa nuna tamakkerlugu maanna paasisitsiniaassutigineqarpoq, taamaammat PAARISA taama kajumissaarivoq. Meeqqat pisinnaatitaaffiinut tunngasut ullumikkut ulloq eqqorlugu oqariartuutigineqarsinnaanissaat pillugu PAARISA meeqqat atuarfiinut atortussianik assigiinngitsunik januaarimi nassitsiortorsimavoq. Soorlu ullorsiutit inini atuartitsivinni iikkanut nivinngarneqarsinnaasut nassiussuunneqarsimapput, Meeqqat pisinnaatitaaffi pillugit Naalagaaffiit Peqatigiit isumaqatigiissutaat pillugu allaaserisat immikkut toqqarneqarsimasut ullorsiummi tassani atuarneqarsinnaapput, ullorsiutit aamma pissanganartunik assiliartalersugaapput. Mærkit nipitittakkat saqqarmiuusallu ima allassimasut aamma ilaapput, taakku ima allassimallutik: ”Meeqqanik atornerluineq unitsiguk!” aamma saqqarmiuaqqat paasisitsiniaanerup ilisarnaataanik assiliartallit: naasunnguaq oranngiaasoq qeqqani aappalaartumik uummatitalik. PAARISA tassa neriuppoq meeqqat kinguaassiutitigut atornerlunneqartarnerat pillugu ullumi nalunaaqutaq ataatsimut malunnartinniarneqarnerani tamakku tamarmik iluaqutaassasut.