Nunatsinni coronaviruseqartutut paasineqartoq kingulleq apriilip ulluisa sisamaanni nalunaarutigineqarpoq - taamaattumik paaqqutarisariallit angerlarsimafiini sulisut pulaartoqaqqittalernissaq merseriunnaarpaat. Assi: KNR

Paaqqutarisariallit angerlarsimaffiinut pulaaqqittoqarsinnaanngortoq

Inuit imminnut meterinik marlunnik ungasitsigisassapput, katerinnermi amerlanerpaamik 15-iussapput assatillu tamatigut tunillannartuiaasertassavaat. Kommuneqarfik Sermersuumi paaqqutarisariallit angerlarsimaffiinut pulaarnermut piumasaqaatit tamakkuupput.

Coronavirusi nunatsinnut anngummat, Kommuneqarfik Sermersooq paaqqutarisariallit angerlarsimaffiinut najugaqatigiiffiinullu pulaaqqusiunnaarpoq.

Nunatsinnili coronaviruseqartutut paasineqartoq kingulleq apriilip ulluisa sisamaanni nalunaarutigineqarpoq - taamaattumik paaqqutarisariallit angerlarsimaffiini sulisut pulaartoqaqqittalernissaq merseriunnaarpaat. 

- Ataatsimilli pingaarutilimmik eqqaamasassaqarpugut. Ilami aanaa aataaluunniit maqaasisimagaluarukkuluunniit eqitaaqqusaanngilat, utoqqarnik sullissinermi ingerlatsisoq Arnannguaq Heilmann Christensen oqarpoq.

Eqqiluisaarnermut inunnullu allanut qanillattunnginnissamut innersuussutit tamarmik suli atuuttut, taanna oqarpoq.

- Tassa imaappoq, inuit imminnut meterinik marlunnik ungasitsigisassapput, aamma nuannermut allamilluunniit nappaateqarnermut minnerpaamik ersiuteqarunik nigorsimaassapput.

Assatit errortukkit tunillannartuiaaserlugillu

Pulaartut assatik errortorlugillu tunillannartuiaasertassavaat, taakkulu amerlivallaannginnissaat paaqqutarisariallit angerlarsimaffianni sulisunit eqqummaariffigineqarluassalluni. 

- Ilaannikkut kaffillertarpugut – aalajangerpugullu inuit amerlanerpaamik 15-it inersuarmeeqatigiissinnaasassasut, Arnannguaq Heilmann Christensen oqarpoq.

AAMMA ATUARUK Kommune Kujalleq tilbyder mormorbesøg på iPad

Taassuma oqarnera naapertorlugu Kommuneqarfik Sermersooq paaqqutarisariallit angerlarsimaffiini qanoq amerlatigisunik ikitsigisunilluunniit pulaartoqaqqusaaneranut amerlassusiliisimanngilaq. Katerinnermili inuit 100-nit amerlaneroqqusaanatik.

Nunatsinni paaqqutarisariallit angerlarsimaffiini assigiinngitsuni najugallit ilaquttaminnik ikinngutiminnillu Facebookimi videokkut coronavirusip ajornartorsiortitsinerani attaveqaqateqartarnissaminnut taakkunani sulisunit ikiorneqartarsimapput.
 

Isummersuutit