Paaqqinnittarfiit Kujataani amigaatigineqaqaat

Ulloq unnuarlu paaqqinniffinni atugassarititaasut kujataani isumaginninnermi ataatsimiititaliamit naammaginartinneqanngilluinnarput - tamakkulu pitsanngorsarneqarnissaat anguniarlugu Namminersornerullutik Oqartussanut maanna saaffiginninnialerput.

Qaqortup, Narsap Nanortallillu kommuniini ataatsimiititaliami siulittaasut sapaatip akunnerata uuma ingerlanerani ataatsimiikkamik taama aalajangerput.

Ulloq unnuarlu Kujataani paaqqinnittarfiit amigaatigineqangaarmata, tamassuma kingunerisaanik isumaginninnermi ataatsimiititaliat allamik periarfissaqanngillat, iluarsiissutissanik akisoorujussuarnik nassaarniartariaqartarlutik.

Ulloq unnuarlu paaqqinnittarfinnik naammattunik peqarnissaa Namminersornerullutik Oqartussat akisussaaffigigaat allakkani malugeqquneqaraluartoq, isumaginninnermi ataatsimiititaliat maalaaruteqaannanngillat – namminnermi aamma iliuuseqarniarput.

Taakkumi akuersissutigaat, ajornartorsiummut qanoq iliuuseqartoqassasoq. Tassa qaammarsaanermik suliniutiginnittoqalissasoq, pingaarnertut sammillugu meeqqanut perorsaaneq angajoqqaat akisussaaffigigaat – ilaqutariit tamakkiisumik ataatsimoortutut isigineqartassapput, tamannalu aallaavigalugu suliutit ingerlanneqartassapput.