Paanngortorsuusimasumik nassaartoqarpoq
Spaniamiut ilisimatuut Europami uumasut annersarisimagunagaannik nassaarsimapput.
Uumasupiluunersuaq – 48 tonsinik oqimaassuseqarsimassangatinneqartoq – Loch Ness-ip uumasorujussuata titartarneqartarneratut isikkoqarsimassaaq.
Europami qangarsuaq uumasut annersarisimassagunarpaat. Ilimagineqarpoq 38 meterinik takissuseqarsimassasoq, tassa takeqatigalugit bussersuit pingasut siuleriissillugit inissitat. Aamma maanna nunarsuarmi miluumasut annersaannit – tunnulissuarmit – bussip affaatut atsigisumik takinerusimassangatinneqarpoq.
Uumasup saarngisa ilai 2003-mi nassaarineqarput. Maannalu nassaarisat ima amerlatigilerput, allaat Spaniamiut ilisimatuut isumaqalerlutik uumasorujussuarmik nutaamik Europami uumasuusimasumik nassaarsimallutik. Aamma Europami siaruaassimassaqisoq ilamigineqarpoq, tassami uumasoqataanit – immaqa nassaarineqartup illortaavinit – kigutit Frankrigimi, Portugalimi Tuluillu Nunaanni nassaarineqarsimammata.
Uumasorujussuaq Skotlandimi uumasorujussuup Loch Ness-ip titartarneqartarneratut isikkoqarsimanissaa ilimatsaanneqarpoq. Aamma Spaniamiut ilisimatuut marluusut saanernik misissuisimasut oqaatigaat uumasorujussuaq naasortortuusimassasoq.
