Paamiut uparuartuinernut sakkortuumik akerliliipput

Paamiuni ilaqutariit 23-t iniminnit anisitaanerisa kingorna Paamiut Kommuniat innuttaminik isumaginnissinnaannginnerarlugit Demokraatinit uparuarneqarnerat maanna kommunimit akineqarpoq. Paamiuni borgmesteri Lars Sørensen tusagassiutinut allagaqarluni INI A/S, politiit, Demokraatillu sakkortuumik akerlilerpai.

Paamiut Kommuniat innuttaminik sumiginnaanngilaq, Paamiuni borgmesteri Lars Sørensen oqarpoq. Ilaqutariit 23-iunerarneqarnerat aamma eqqunngilaq, anisitaasut inini 15-neersuusut katillugit 20-t missaannaanniikkamik. Anisitaasut aamma tamarmik suliffeqarput namminneq pilersortuullutik, ataasiinnarluunniillu kommunip isumaginninnermut ataatsimiititaliaanut ikioqqulluni saaffiginnissimanngilaq. Taama borgmesteri Lars Sørensen tusagassiutinut allagaqarpoq.

Lars Sørensen-ip anisitsisoqarsimanerani INI A/S, politiillu sakkortuumik uparuarpai, kikkut anisinneqartussaaneranik kommunimut ilisimatsitsisimanngimmata.

INI A/S-ip upernaaq kommunimut ilisimatitsissutigaa attartortut akiitsoqarnertik pissutigalugu allaffigineqarsimasut, kingornalu tutsiuteqqinnatik. Taamaammat kommuni INI A/S-ip utoqqatsernissaanik piumasaqarput.

Demokraatit isumaginninnermut tunngasuni oqaaseqartartuat Astrid Fleischer Rex aamma sakkortuumik uparuarneqarpoq. Lars Sørensen isumaqarpoq Astrid Fleischer Rex-ip oqaaserisani tunuartittariaqarai paamiormiunullu utoqqatserluni, Lars Sørensen-illu tupigusuutigaa nunatta sinnerani anisitsisarnerit amerlasuut qisuariarfigisimanngimmagi.

Kommunimi isumaginninnermut immikkoortortaqarfimmi pisortamit John Rasmussen-imit oqaatigineqarpoq, inuit tallimat pisumi ikiorneqareersimasut iniminnullu utereersimasut.

Ilanngullugulu oqaatigaa INI A/S-p anisitaasussat pillugit paasissutissanik kommunimut nassiussisimanngimmata, paasissutissallu aatsaat ullaaq tigusimagamigit ikiornissaannut kommunimit qisuariarsinnaasimanatik.

Pisoq pillugu INI A/S-imit oqaaseqarusuttoqanngilaq.