Assi: Kommuneqarfik Sermersooq

Paamiut ullumi ukiunik 275-inngortorsiortoq

Paamiut ullumi ukiunik 275-inngortorsiorput. Asii Chemnitz Narupip innuttaasut nalliuttorsioqatigai illoqarfiullu siunissaqarluarnera takusinnaanerarpaa.

Kalaallit Nunaata nunasiaatinngortinneqarnerani niuertup Jacob Severinip Paamiut Frederikshåbitut 1742-mi toqqavilerpaa, kunngi Frederik arferngat ((VI-mut)) atsiullugu.

- Paamiormiut uummammik pisumik illoqarfissi, illoqarfitta 275-iliinerani pilluangaangaaritsi, qujanarsuarlu tamanut, ulloq nuannersumik nalliussiniarisiuk, uagut maani paamiormiut nunaqqatigut kaffisoqatigiumaaratsigit, ilissi timersortarfimmiinnissinni. Ullorsiorluarisi, nuannaaqataavunga.

Kommuneqarfik Sermersuup borgmesteria Asii Chemnitz Narup taama oqarpoq, silap pitsaavallaannginnerata kingunerisaanik kaffillertoqarnissaanut peqataasinnaannginini aamma oqaatigalugu.

Paamiut pilersorneqarniarnera Severinip tikinneranit ukiuni siullerni ajornakusoortinneqarsimavoq, allaallumi taamaatiinnarniarneqaleraluarluni. Sikorsuimmi ilaatigut ajornartorsiortitsisarsimapput.

Arfanniarnerulli puisinniarnerullu iluatsikkiartornera pissutaalluni illoqarfik siuariartupallappoq.

AAMMA ATUARUK Royal Greenland saarullinnik tarajortilaakkanik Paamiuni tunisassiulersoq

Paamiut ineriartortitsiffiulluarsinnaanissaa, G 60 pillugu isumalioqatigiissitap 1960-ikkut aallartinneranni nalilerpaa, illoqarfillu taamaammat tamaani najugaqartunut pingaarnertut toqqarneqarluni.

Saarullinniarneq 1967-imi ingerlalluarpoq, saarullinnillu tunisassiorfik Nunatsinni annerpaaq taamanikkut pilersinneqarluni.

Saarulliilli 1980-ikkut ingerlaneranni tammariartornerat illoqarfimmut eqquisimaqaaq.

Aalisarnerulli Paamiunut siunissami ingerlualernissaanut Asii Chemnitz Narup neriulluarpoq:

- Umiarsualivitoqqap eqqaaniittut illutoqqat isigigaangakkit kissaateqartaraluarpunga takorluuisarlunga qanorli Nunatsinni umiartornermi oqaluttuarisaaneq pillugu katersugaasiviliortoqarsinnaasuuppat qanoq nuanneq, Asii oqarpoq.

AAMMA ATUARUK Imermik tunisassiornissamik suliniut Paamiuni aallartisarneqalersoq

Paamiut, kommunit 2009-mi aaqqissuusseqqinneqarnissaasa tungaannut Paamiut Kommunianni pingaarnertut taamanikkut soorunami inissisimavoq.

Naak Nuuk illoqarfittut Kommuneqarfik Sermersuumi ukiuni makkunani sammineqangaatsiaraluartoq, Asii Chemnitz Narup Paamiut pillugit neriulluarpoq:

- Aalisakkanik tunisassiorfiup ingerlaannarnissaanik aamma pingaartuusorivara aamma kissaatiginartorujussuussagaluarpoq tunisassiassanik nutaanik nutaaliornikkut aamma fabrikkip ingerlanissaa immaqa aamma annertusisamik taanna isumaqarpunga Paamiut oqaluttuarisaaneranut paamiormiullu kinaassusianut pingaaruteqarluinnartuusoq.

Kommuneqarfik Sermersuup borgmesteria Asii Chemnitz Narup, suleqatitsinnut Jonas Fievémut taama oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat