Paamiut Kommuneat: Meeqqap ajutoorneranut akisussaanngilagut
Nukappiaqqamut annertuumik ajoqusertumut aanaajusoq Else Thorsenip ajutoornermi akisussaaffik kiap tigussaneraa ujartorpaa:
-Misigisaq sakkortoqaaq ajoquserujussuarnerani. Qarasanngua aanaartoorsimammat, qarasaaniittorlu saania peersimammat, puaa pullaarsimagami najungasuiarluni, kuutsii napillutik, tingummigut aanaartoorluni taavalu aamma aammigut toqunartoqalersimanermigut inuunera navianartorsiorujussuarluni. Migisisaq sakkortoqaaq, uagullu ilaqutariit naalliussimaqaagut. Neriuppugut pisimasoq pillugu akisussaaffik arlaata tigussagaa, taama oqarpoq Ivimmut arfineq marlunnik ukiulimmut aanaajusoq Else Thorsen.
Paamiut kommuneata ataani suliniummi Paamiut asasara-mi ilaqutariinnut neqeroortoqarmat asiarsimaartsinissaq sioqqullugu meeqqat 18-it ataallugit ukiullit akisussaaffiginnginnissaat kommunimit erseqqissaassutigineqarsimavoq.
Paamiuni kommunaldirektør Heidi Jeremiassen Kujataata Radioani suleqatitsinnitt Bitten Høegh Damimit oqaloqatigineqarluni ima nassuiaateqarpoq:
-Tamanna neqeroorutigineqarmat peqataasunut tamanut erseqqissaassutigineqarpoq peqataasut namminneq akisussaaffigissagaat. Meeqqat 18-it ataallugit ukiullit peqataanissaminnut soqutiginnittut ilaat itigartittariaqarsimavagut, Heidi Jeremiassen oqarpoq nangillunilu:
-Ivimmut tunngatillugu Paamiut kommuneat suliniutip Paamiut asasarap iluani, isumaqatigiinnikkuuvugut, Ivimmut tunngatillugu sumilluunniit pisariaqartissinnaasaanik ikiorniarlugu piareersimalluta, taama oqarpoq Paamiuni kommunaldirektør Heidi Jeremiassen.
