Paamiut illoqarfiani nannuttoqarpoq

Nutartigaq: Paamiuni illoqarfiup iluani ullaap tungaasut nannuttoqarpoq. Paamiunilu nannuttoqartarnera akuttummat meeqqaniit utoqqarnut alutorsaassimapput.
Allattoq Najaaraq Egede
marsip 09-at 2010 08:25

Nanoq arnaviaavoq inersimasoq, illoqarfiup iluani blokkit akornanni takuneqarami, piniartunullu kalerriutigineqarami inuussutissarsiutigalugu piniartumit Siverth Knudsen-imit pisarineqartoq.

-Aallaleruttorluta aalisarialeruttorluta kalerritseriataarama nanorooq, biilini ingerlapallakkatta aallaasimik tiguseriarluta, tappavani illut akornanniittoq. Taava avannamukaarujoortoq malillugu aallaavara, Siverth Knudsen Paamiuni piniartoq oqarpoq.

Pisoq nalinginnaanngimmat innuttaasunit alutorsaatigineqarsimaqaaq.

-Atuarfik inuerussimavoq, pilukkallutik meerarpassuit hurraartuuttarlutillu nuannattorsuupput, nuannaaqaat illoqarfimmiut soorlu sorujussuarmik susoqarsimasoq. Arfakkaangattaluunniit taama nuannatsigisoqarneq ajorpoq, nannumik pisaqartoq Siverth Knudsen oqarpoq.

Nannup neqaa trikineqarnersoq Nakorsamit misissorneqareerpat tuniniarneqassasoq Siverth Knudsen oqarpoq.

Namminerligooq nannuttami amia assiliaatitaariniarpaa.