Paamiut Asasara Canadami tigulluarneqarpoq
Paamiuneersut Søren Lyberth aamma Heidi Jeremiassen Canadami Halifaximi ataatsimeersaurtuni peqataareerlutik uteqqammerput. Meeqqat ajornartorsiuteqarlutik peroriartorsimasut, soorlu peqqarniisaarnermik, assortuunnernik misigisaqartarsimasut, angerlarsimaffimmiluunniit imigassartorfiusumi peroriartorsimasut, ataatsimeersuarnermi sammineqarput, nunarsuarmiillu assigiinngitsuneersut 500-init amerlanerit ataatsimeersuarnermi peqataapput. Meeqqat misilittagaat peqataasut oqaluttuaraat, nunallu 25-t kulturiat atugarisaallu assigiinngikkaluaqisut, meeqqat misilittagaat assigiittorujussuusut takuneqarsinnaavoq.
Søren Lyberthip Heidi Jeremiassenillu Paamiuni suliniutertik, Paamiut Asasara, saqqummiuppaat. Meeqqat suliummi suleqatigineqarput, qitiutinneqartorujussuullutik, ilaqutariinnilu ajornartorsiutinut akiuussinnaaneq ilinniartitsissutigineqarpoq. Søren Lyberth KNR-imut oqarpoq, Paamiut Asasara assorsuaq soqutigineqartoq, nunallu arlallit suliniut pillugu attaveqartarnissartik assut soqutigileraat.
Ataatsimeersuarnermi anguneqartunut ilaavoq, meeqqat sumiginnakkat atornerlunneqartartullu pillugit nunarsuaq tamakkerlugu attaveqarfiliortoqassasoq, taamaalilluni misilittakkanik avitseqatigiittoqartalersinnaaniassammat, meeqqallu inuunerissaarnerunissaat anguneqarluni.
