Paamiuni utoqqaat illuat pulaarfigeqqusaanngikkallarpoq

Paamiuni utoqqaat ulluni makkunani pulaarlutillu pulaarneqarsinnaanngikkallarput. 'Puilasunnguani' ineqartut 19-it ilaat naarluussuarmit eqqorneqarsimapput, taamaammallu nalinginnaq aneqqusaajunnaarallarlutik.

- Taamaaliorpugut utoqqaat sanngiinnerusinnaammata, unalu nualluut timmissutaallunilu meriassutaasoq ima peruluutaatigaaq, allaat tunillaassuunnissaa mianersuutigisariaqarluni, peqqissaasoq Frederikke Berg oqarpoq.

Nualluutit ilaat Norwalk-imik taaguuteqartoq ulluni pingasuni sisamaniluunniit atuuttarpoq, qaangiunnissaata tungaanut eqqissisimaarnissaq imerluartarnissarlu pingaaruteqarnerpaapput.

- Utoqqaatigut arlallit ulluni kingullerni eqqugaapput, maannalu sisamat suli naarlullutik. Pulaarneqarnissaat sapaatip-akunnerata naanera ilanngullugu killilersimaarparput tunillaassuunnera uninniassammat. Taamaammat aamma eqqiluisaarneq assut maani pingaartipparput, Puilasunnguani immikkoortortami pisortaq Katrine Petersen oqarpoq.

Paamiuni illoqarfiup nakorsatuaa napparsimammat utoqqaat illuaniittut peqqissaasumit alakkarneqartarput.