Paamiuni ujaarineqartoq suli nassaarineqanngilaq

Paamiuni ujaarineqartoq angut 77-nik ukiulik Adam Petersen suli nassaarineqanngilaq. Paamiuni politiit inuillu piumassutsiminnik ujaasisut illoqarfik tamaat qaqqat nunallu sineriaa tamaat ujaasiffigigaluarpaat.
maajip 26-at 2008 08:54

Adam Petersen utertuuvoq ippassarlu ualikkut kingullermik takuneqarpoq.

Paamiuni politiit ittuat Bo Edvardsen radio aviisimut oqaluttuarpoq, arlalinnik saaffigineqarsimallutik arlaqaqisullu aamma nammineq piumassutsiminnik ujaaserusussimasut.

Politiit ittuata Paamiuni innuttaasut kajumissaarpai ujaarineqartup oqquiffigisimasinnaasai quit, kiilerit assigisaallu misissussagaat.

Adam Petersen 170 centimeterimik angissuseqarpoq tuattuuvoq nujaalu qeeqarlutik. Angut pineqartoq pillugu inuit paasissutissiisinnaasut Paamiuni politiinut attaveqaqquneqarput oqarasuaammut: 68 12 22, tassa 68 12 22-imut.