Paamiuni suliunnaartussat amerlasuut

Paamiuni saattualerineq ullumi unissaaq, pisassat qaavatigut pisassiissutigineqartut tamakkerneqarmata. Paamiuni Royal Greenlandip saattualeriffiani kiisalu Tunitsivik Paamiut A/S-mi sulisut suliunnaarallartussanngorput.

Paamiuni saattualerineq unimmat inuppassuit isertitatigut eqqugaasussanngorput. Paamiuni saattualerinermik suliffeqarfiit marluk Royal Greenland aamma Tunitsivik A/S katillutik 45-inik saattualerisoqarput, Royal Greenlandimi 30-inik Tunitsivillu Namminersortoq 15-inik.

Saattualerineq unippat saattualerisuinnaanngitsut aammali saattuarniartut saattualeriffinnilu sulisut allat aqagumiit qaammatini marlussunni tulliuttuni suliassaarukkallartussanngorput.

Suliunnaarallarnermik eqqugaasussat allanik suliffittaanngikkunik pisortat ikiorsiissutaannik pisariaqartitsisunngussapput, tamannalu pillugu

Paamiut kommuneata Royal Greenland Tunitsivik A/S-ilu ullumi ataatsimeeqatiginiarpai.

Saattuarniarnerup unitsinneqarnissaa ullormik ataasiinnarmik piffissalerlugu nalunaarutigineqarmat Royal Greenland sulisumi 30-it suliunnaarnerisa nalaanni pikkorissartitsinissamulluunniit piareersimanngitsoq, Paamiuni Royal Greenlandip suliffissuani pisortaq Shahryar Bordbar oqarpoq.

Bordbar oqarpoq ullormik ataasiinnarmik periarfissiilluni Aalisarnermut Pisortaqarfimmit nalunaaruteqarneq pissutigalugu aalisakkanik allanik tunisassiorsinnaanissamut Royal Greenland aamma piareersimanngitsoq.

Paamiut Tunitsivik A/S-ip pisortaa Arvid Buhrkal oqarpoq tunisassiornertik sapaatip akunnerata tullianiik univikkallartussanngortoq sulisumillu suliunnaarallarneranni Tunitsivik annertunerusumik iliuuseqarsinnanngitsoq oqaatigaa.

Paamiuni Royal Greenlandip kiisalu Tunitsivik A/S-p pisortaasa tamarmik tikkuarpaat saattualerisuinnaanngitsoq aammali ilaqutaat saattualeriffinnilu allanik suliaqartut aamma eqqugaasussanngormata.

- Neriuutigaarput saattuartassat amerlineqarsinnaajumaartut, tassami allatut aaqqiissutaasinaasunik takusaqaruminaammat, minnerunngitsumillu Nuup Paamiullu akornanni piffissami matumanerpiaq saattuarpassuaqarmat, Tunitsiviup pisortaa Arvid Buhrkal taama oqarpoq.

Kanuaanap pisortaa Mads Nedergaard ilisimatitsivoq Paamiuni saattuartassiissutit qaavatigut pisassiissutit 400 tonsiusut suli tamakkerneqanngitsulluunniit saattuarniarnermik unitsitsineq, pisasseeqqinnerup siornagut pisassanik qaangiisimanermik peqquteqartoq.