Paamiuni suliffissaaleqisut appariarujussuarsimapput

Paamiut kommuniani suliffeqarfiit assigiinngitsut sulisussanik amigaateqarput, suliffissaaleqisullu 20-t ataallugit amerlassuseqarput.

Paamiuni Aalisakkanik tunisassiorfik siorna aallartippoq, aalisakkanik tunisassiorfiup aallartinnissaa sioqqullugu suliffissaaleqisut 150-t missaanniittaraluarsimapput, maannalu suliffissaaleqisut appariangaatsiarsimapput, tassami 20-t ataallugit amerlassuseqartalermata.

- Royal Greenlandip siorna pilersitsinera sunniuteqarsimaqaaq, tamannarpiarlu taama inissisimalertoqarneranut peqqutaavoq, taama oqarpoq, Paamiut kommuniani suliffeqarnermut

Inuussutissarsiornermullu pisortaq Niels Løvstrøm Petersen.

Paamiuni aalisakkanik raajanik assagiarsunnillu tunisassiorneq inuussutissarsiutaallualersimagaluaqisoq, meeraallunili aalisartuusimasoq Steffen Hansen nunami suliaqartariaqalerpoq.

- Raajat akii apparmata imminullu akilersinnaajunnaarmata aalisarunnaarnikuuvunga, maannalu ungdomsklubbimi pisortatut sulivunga, ukiorpassuit aalisartuunikuugama soorunami maqaasinartaqaaq, Steffen Hansen oqarpoq.

Taamatuttaaq Paamiuni suliffeqarfiit sulisussanik amigaateqartarput.

- Sulisoqarniarnermut tunngatillugu suliffeqarfiit assigiinngitsut sulisussanik amigaateqartarput, tamannarpiarlu peqqutigalugu maanna suliffissaaruttut 20-t ataanniipput, Niels Løvstrøm Petersen oqarpoq.