Borgmesteri: Paamiuni suleqatigiinneq utoqqarnut iluaqutaassaaq
Paamiuni utoqqaat illuat nutaaq illoqarfiup qeqqaniittoq pisortigoortumik pingasunngorpat juunip ulluisa aqqaneq aappaanni atoqqaarfissiorneqassaaq.
- Utoqqaat illuat nutaaq peqqinnissaqarfillu uiguleriipput taamaalilluta utoqqaanerusunut isumassuineq peqqissaanerlu neqeroorutigisinnaanngorpavut, angerlarsimaffillu nutaarluinnaq iserterfigineqareerlunilu utoqqaat nutaamik avatangiiseqalerput, Asii Chemnitz Narup oqarpoq.
Isumaqatigiissusiorneq Paamiuni innuttaasunut minnerunngitsumillu illoqarfimmi utoqqaanerusunut iluaqutaassasoq, borgmester oqarpoq:
- Paamiut pillugu isumaqatigiissut Peqqinnissaqarfiup Kommuneqarfik Sermersuullu akunnerminnik isumaqatigiissusiornikkut qulakkeerneqarpoq, Paamiunilu sulisut aqutsisullu qanimut suleqatigiinnissaat imminnullu isumasioqatigiinnissamik periarfissaqalissapput, Narup oqarpoq.
Isumaqatigiissusiornerlu Peqqissutsimut Naalakkersuisuisumit Martha Abelsenimit nuannaarutigineqarpoq:
- Nuannaarutigeqaara isumaqatigiissutip siornatigut atsioqatigiiffiusimasoq Paamiut pillugu isumaqatigiissummik malitseqartinneqarmat, isumaqatigiissummi suleqatigiissinnaanermik assersuutaalluarpoq naatsorsuuteqarfigilluarparalu, Martha Abelsen oqarpoq.
Paamiuni utoqqaat illuat 55-60 milliuunit koruunit missaannik akeqarpoq, aningaasartuutillu affai Namminersorlutik Oqartussanit aningaasaliiffigineqarlutik.
Qeqertarsuarmi utoqqaat angerlarsimaffiat napparsimmavillu 2000-ikkut aallartinneranni uiggiunneqarput, tamatumalu kingorna Qasigiannguani maannalu Paamiuni taamatut aaqqissuussisoqarluni.
