Paamiuni oqaluffik ukiunik 100-liivoq
Nunatsinni oqaluffiit kusarnarnersaasa ilaat Paamiuni “Eqqissinerup oqaluffia” sananeqarsimanerminiit ukioq manna ukiunik 100-liivoq. Ullumikkut malunnartitsiniaanermi naalagiaqatigiittoqarpoq, innuttaasunullu susassaqartitsisoqarluni.
Nunatta biskoppia Sofiannguaq Petersen naalagiartitsivoq, nerliiviliartoqarlunilu, naalagiarnerullu nalaani erinarsoqatigiit Nagdla tussiutinik atuillutik.
Kommuneqarfik Sermersuup borgmesterimut tullersortaa siulleq Astrid Fleischer Rex nalliuttorsioriartunut ilaavoq, kommunalbestyrelsemilu ilaasortat Paamiuni najugallit innuttaasullu aamma naalagiaqataallutik.
Oqaluffik 1909-mi sananeqarami organip Jonathan Petersenip qatanngutaasa ilaat marluk oqaluffimmik sanasuupput, siuttuulluni ajoqiuneq Anders Petersen. Norgemiut oqaluffilioriaasiat Stavkirkemik taaneqartartoq titartaganngorlugu Danmarkimit nassiunneqartoq najoqqutaralugu oqaluffik sananeqarpoq.
Eqqissinerup oqaluffia takornarianit alutorineqarluartartuuvoq.