Paamiuni Nuummilu saattuarniarneq juulip tallimaani unitsinneqassaaq
Paamiuni Nuummilu sinerissap qanittuani saattuarniarneq pingasunngorpat juulip tallimaani unitsinneqassasoq Namminersornerullutik Oqartussat nalunaarutigaat.
Aalisartut isertitaarunnissaannik kinguneqartussaammat, pisassiissutit nungungajalersut paasineqarmalli, KNAPK maajip 17-iani Aalisarnermut Piniarnermullu Naalakkersuisumut pisassassat amerlineqarnissaat siunertaralugu saaffiginnissuteqarsimagaluartoq, KNAPK-p siulittaasua oqarpoq:
- Aalisartut isertitaat uniinnavillutik unittussaammata, tamanna ajuusaarutigaarput. KNAPK-minngaanniit maajip 17-ianili assagiarsuttassat amerlineqarnissaat pillugu saaffiginnissuteqaraluarpugut suli akineqanngitsunik. Naalakkersuisup aalisartut atugaasa pitsanngorsarnissaanut piumassusikippallaaqaaq, Peter Olsen oqarpoq.
Peter Olsenip ilanngullugu oqaatigaa, juulip arfineq-pingajuanni aalisarnermut siunnersuisooqatigiinni ataatsimiinnissaminni qinnuteqaateqaqqinnissartik eqqartussallugu.
Sisimiuni Qeqertarsuullu tunuani pisassat affaat pisarineqareersut aamma oqaatigaa.
Aalisarnermut Piniarnermullu Pisortaqarfimmit nalunaarutigineqarpoq, pisassiissutiit taama nungujaartiginissaat ilimagineqarsimanngikkaluartoq. Sinerissap sinnerani pisassiissutit sinneri qanoq annertutigisumik sinneqarnersut aqagu paasineqarsinnaassasoq, Aalisarnermut Piniarnermullu Pisortaqarfimmi pisortaq Emanuel Rosing ilisimatitsivoq.
