Paamiuni mittarfissaq kinguaqqippoq

Paamiuni suluusalinnut mittarfiliarineqartup tungaanut aqquserngup inaarsarnissaanut aapaagumut aningaasaliissutissat peerneqassasut inatsisartuni aningaasaqarnermut ataatsimiitsitaliaq siunnersuuteqarpoq.

Narsami, Nuummi, Sisimiunilu talittarfiit allilerneqarnissaanut aningaasat nuuneqassasut siunnersuutaalluni. Tamannalu Paamiuni mittarfiliornissap taamaatinneqarneranik isumaqanngitsoq Angallannermut naalakkersuisoq Jens Napaattooq oqarpoq.

Illoqarfiit mittarfiliorfiusussat tulliuttut arfineq marluk eqqarsaatigalugit Paamiut salliutinneqassasoq isumaqartuarluni Angallannermut naalakkersuisoq Jens Napaattooq oqarpoq.

Mittarfissallu tungaanut aqquserniornissamut aapaagumut aningaasaliissutissat peerneqarput, Narsami, Nuummi, Sisimiunilu talittarfiit allineqarnissaanut aningaasat atorneqassasut pingaarnerutinneqarmat, Jens Napaattoq oqarpoq.

-Ukiunut qulinut 15-inulluunniit pilersaarusiornissaq siunnerfigineqarpoq, kujataanilu mittarfiliassanut Paamiut aamma ilaatinneqarpoq qujanartumik, Jens Napaattooq oqarpoq.

Suleqatigiissiatallu tamatumani suliaqartussap saqqummiussaqarnissaa Naalakkersuisunut ilaasortap qilanaarinerarpaa.

Talittarfeqarnikkullu imaannaangitsumik inissisimasoqarnera pillugu Jens Napaattooq isumaqarnerarpoq Nuummi Narsami Sisimiunilu talittarfiit allineqarnissaat pingaarnerusoq, inuussutissarsiutit illoqarfinni taakkunani ingerlanneqartut siuarsarneqarnisassaat eqqarsaatigalugu. Nuummi talittarfiup allineqarnissaa aamma utaqqeqqinneqarsinnaangitsoq isumaqarnerarpoq.