Paamiuni mittarfissaq atoqqaarfissiorneqangajalerpoq

Mittarfik timmisartunut suluusalinnut atorneqarsinnaasussaq naalakkersuisunut ilaasortanit arlalinnit atoqqaarfissiornermi ammarneqassaaq, Paamiunilu innuttaasut illoqarfik qulaavaallugu timmisartumut ilaatineqarsinnaassallutik.
Allattoq Mads Lynge
novembarip 28-at 2007 13:20

Paamiuni timmisartunut suluusalinnut mittarfik decembarip aallaqqaataani atoqqaartinneqalerpoq, Naalakkersuisullu siulittaasuat Hans Enoksen, naalakkersuisunullu ilaasortat, Kim Kielsen, Siverth K. Heilmann, Finn Karlsen, Arkalo Abelsen kiisalu Namminersornerullutik Oqartussat pisortaanerat Kaj Kleist unnukkut nereqatigiinnermi peqataassapput.

Illoqarfik qulaavaallugu timmisartumut ilaanissaq Air Greenlandimit Paamiormiunut tunissutigineqassaaq.

Paamiuni mittarfik mittarfiit arfineq marluusut Namminersornerullutik Oqartussat ukiuni kingullerni sanatitaasa kingullersaraat.

Mittarfimmut, mittarfiup tungaanut aqqusinermut, mittarfiup illutaannut, atortunullu koruunit 160 miliuunit missaat atorneqarput.

Paamiut silaannakkut manna tikillugu taamaallaat qulimiguulimmik tikinneqarsinnaagaluarpoq, decembarimiilli Dash 7, 46-nik ilaasoqarsinnaasoq Paamiuliartalissaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq