Paamiuni mittarfiliortoqarnissaa tapersersorneqarpoq - aappaatigooqartumilli

Allattoq Mads Lynge
juulip 19-at 2005 12:05

Paamiut mittarfeqalernissaa inatsisartuni ilaasortanit amerlanerussuteqartunit tapersersorneqaraluartoq aappaatigooqartinneqarpoq.

Naalakkersuisunut illua’tungiliuttut isumaqarput naalakkersuisut sipaaruteqarniaannarlutik taamatut aaqqiissuteqartut. Demokraatit siulittaasuat Per Berthelsen ima tunngavilersuivoq:

- Naalakkaersuisut sipaaruteqarnissaq tunngavigalugu siunnersuutaat silaannakkut angallassineq saaliutinneqalerpoq, taamaappallu Paamiuni mittarfik aallartinneqareersoq tassunga naapertuuppoq naammassineqassammat, Per Berthelsen oqarpoq. Air Greenlandip aamma Arctic Umiaq Line-p ataatsimut kattunneqarsinnaanissaat periarfissaasoq Demokraatinit qangalili oqaatigineqartarsimanerarneqarportaaq.

Illua’tungiuliuttulli kisiartaanatik Paamiuni mittarfiliortoqarnissaa nangaassutigaat. Siumumiit Ole Dorph isumaqarpoq suliaq pipallataavallaartoq:

- Imminut aperivunga: Sooruna? Eqqarsaatigissagutsigu qaammatit marlussuit matuma siornatigut Nuup Ilulissallu mittarfii tallinissaat annertuumik naalakkersuisunit eqqartorneqarpoq, kisianni massakkut taakku marluk peerlugit Paamiut aamma qaqinneqariataarpoq. Tamanna pissutigalugu inatsisartuni ilaasortaasugut aperisariaqarpugut: Nunap tamaa isigalugu pilersaarummik atuuttussamik sooruna naalakkersuisut pilersitsinianngitsut? Ole Dorph Siumumeersoq aperivoq. Inuit Ataqatigiinnit Aqqalukasik Kanuthsen oqarpoq IA-mit tapersersorneqartoq. Partiilli allat Paamiuni mittarfeqalernissamut qulartut paasisinnaannginnerarpai:

- Aappaatigooqartitsisinnaaneq uanga apeqqusilaarsinnaavara, paasineqareermat 2006-iminngaanniit silaannakkoorullugu ilaasunik angallassineq inuiaqatigiinnut akilersinnaanerusoq, Inuit Ataqatigiit sinnerlugit inatsisartuni ilaasortaq Aqqalukasik Kanuthsen oqarpoq.

Atassumminngaanniit oqaaseqartitsiniaraluaratta iluatsissinnaasimanngilarput.