Paamiuni meeqqat inuusuttullu sullinneqarnissaannut isumalluartut
Atsiornernik katersuinerup naammassineqarnera uppernarsarniarlugu atsiortitsinernik katersisut ippassaq Paamiuni ilaqutariinnut siunnersuisarfimmi Tilioq-mi atsiornernik kisitsipput, kisitsinermi najuupput, Paamiut Asasarami aqutsisut, politiit inunnik isumaginninnermut immikkoortortaqarfimmersut peqqinnissaqarfimmiillu peqataasoqarluni.
Atsiortitsinernik katersinikkut uppernarsarneqarpoq Paamiuni meeqqanut inuusuttunullu suliniuteqarnerni peqataanissamut soqutiginninneq, tamannalu aaqqissuisunit iluarisimaarneqarpoq ingerlatap ”Paamiut Asasara”-p ataani meeqqat inuusuttullu atugaasa pitsanngorsarneqarnissaannut tunngatillugu suliniuteqarnermut piumassuseqarneq takutinneqarmat. Ukioq 2009-mi suliniutissatut siunnerfigineqartut ilaatigut makkuupput: Qitillutik isiginnaartitsisartut marluk pikkorissaassapput, pikkorissaaneq isiginnaartitsinernik januaarip ulluisa 29-anni aamma 30-anni naggaserneqassalluni. Angajoqqaat inuusuttullu ikorfartoqatigiiffiannik pilersitsisoqassaaq. Meeqqat atuarfiata ingerlanerata nalilersorniarnissaa, nutarsarniarnissaalu taamatullu angajoqqaat atuarfimmi peqataatinnerulernissaat suliniutigineqassalluni. Meeqqanut tunngasunik aaqqissuussisarnerit aallartinneqassapput taamatullu nipilersornermut ilinniarfimmik aallartitsisoqassalluni. Timersornerup iluani nunatsinni pissartanngornissaq siunertaralugu sungiusarnerit aallartinneqarnissat 2009-imi pilersaarutinut ilaavoq.
