Paamiuni kinguaassiutitigut innarlerneqarsimasut peqatigiiffiliorput

- Illoqarfitsinni pisariaqartitsisut amerlapput, Peqatigiiffimmi Kialaami siulittaasoq Isak J. Thorsen oqarpoq.

Peqatigiiffimmi kinguaassiutitigut innarlerneqarsimasut ikorfartoqatigiinniarlutik naapittarput, taamaattoq meeqqat inuusuttuaqqallu 18-it inorlugit ukioqartut peqataasinnaanngillat.

- Meeqqat pisariaqartitsisut takusinnaavagut, aamma ilaqutaasut innarliisartullu ikiorneqarnissaminnik pisariaqartitsipput, Isak J. Thorsen oqarpoq.

Paamiunili perorsaasut aamma tarnip pissusaanik ilisimasallit amigaatigineqarput.

Meeraq kinguaassiutitigut innarlerneqarsimasoq ikiorneqanngikkaangami inuunermini innarluuteqalersartoq, tarnip pissusaanik ilisimasalik Connie Gregersen oqarpoq.

- Annilaangajuartarpoq, kamaqarninilu aqussinnaasanngilaa ilami misigissutsini aqussinnaasanngilai, Connie Gregersen oqarpoq.

- Piviusumik paasinnittariaasaat imminnullu isiginnittariaasaat equsoortarput, inunnillu attaveqarniarrnermikkut ajornartorsiuteqartarlutik.