Paamiuni inuusuttut atugarisaat misissuiffigineqarput

- Inuusuttut assigiinngitsunik periuseqarluta apersortarpagut, misissuinerlu ajunngitsorujussuarmik ingerlavoq, pissaganaqaarlu.

Misissuineq pisariaqartinneqarsimannguatsiarpoq, tassami siornatigut inuusuttut atugarisaat immikkut sammineqartarsimanngillat. miisissuisarnerit allat ajornartorsiutinik kiisalu iluamik ingerlanngitsunik aallaveqartunik tunngaveqarnerusarput, uagulli misissuinitsinni paaserusupparput suut ingerlalluarpat, qanoq iliortoqaraangat iluatsittumik ingerlasoqartarpa, tarnip pissusaanik ilisimatusartoq Laila Wattar oqarpoq.

Misissuinermi inuusuttut peqatigineqarluinnarlutik suleqatigineqarput, apeqqutigineqartullu inuusuttunut attuumassuteqartuunissaat pingaartinneqarsimavoq. Apeqqutigineqartut inuusuttup atugarisaanut tunngassuteqarput, soorlu imminut qanoq ilisaritissinnaanersut. Apeqqutillu ilaat siornatigut apeqqutigineqarsimanngimmata akineqannginnerini eqqarsaatigineqarluaqqaartarput, soorlu qanoq ilioraagamik imminnut iluarisimaartarpat, imaluunniit qanorinnikkut tulluusimaarutigisaqartarnersut.

Misissuinermi inuusuttut isumaat kiisalu pitsanngorsaatissatut siunnersuutaasa tusarneqarnissaat anguniarneqarpoq. Suliniummi “Paamiut Asasara”-mi anguniakkanut ilaavoq, inuusuttut atugarisaasa pitsanngorsarneqarnissaat kiisalu inuusuttut inuiaqatigiinnut akuliulluarneqarnissaat misissuinerlu anguniakkanut atorneqarluarsinnaasoq, misissuinermik suliaqartoq Sandy Fanous oqarpoq.

Paamiuni misissuisunut ikiorti Thomas Petersen pissarsiaqarluarpoq.

- Nuanneqaaq paasisaqarnaqaarlu pissaganarlunilu. Paasisagut maani inuusuttut qanoq ingerlariaqqissinnaaneri, suna maani Paamiuni amigaataanersut assigiinngitsorpassuillu. Paasisagullu inoqatsitinnut qanoq ingerlateqqissinnaavagut, kiisalu qanoq ikioqatigiissinnaanerluta, Thomas Petersen oqarpoq.