Paamiuni ilinniartitsisussaaleqineq iliuuseqarfiginiarneqarpoq

Paamiuni ilinniartitsisussaaleqineq anigorniarlugu, kommunip atorfinitsitsiniarnermini pilerinarnerusumik neqeroortalerniarpoq.

Ilinniartitsisut atorfinittut aningaarsarsiaat qaffasinnerussapput inissiatigullu pitsaasunik neqeroorfigineqassallutik.

Paamiut Atuarfiata, ukiuni arlaqalersunik, ilinniartitsisussaaleqineq akiorniartuarsimavaa. Ukioq mannali neriuuteqarput, ukioq atuarfiusoq aggustusimi aallartippat siunissaq qaammanerussasoq.

-Ilinniartitsisut nutaat pingasut soqutiginnillutik nalunaarsimapput, kisianni kommunillu allat noqqoruuppagut, borgmester Lars Sørensen oqarpoq.

Kommunalbestyrelsip kissaataa malillugu, Paamiut Atuarfiani pissutsit upernaaq manna misissuiffigineqarput.

-Taamatut kissaateqarneq innuttaasut ataatsimiitereernerannit tunngaveqarpoq. Paamiuni ilinniartitsisussaaleqineq pillugu innuttaasut ataatsimiitinneqarmata, kissaatigineqarpoq iluarsiissutissanik ujarlertoqartariaqartoq. Ullumikkullu atorfinitsitseriaaseq inissiatigullu atukkat iluarsiivigineqarput, taama oqarpoq Lars Sørensen.

Akissaatitigut qaffaasoqarsimavoq aammalu ulluni makkunani inissiatigut suliat naammassiniarneqarput, illuatungaatigut atorfinitsitsinermi piumasarineqarpoq isumaqatigiissuteqarnikkut ukiuni pingasuni atuuttumik Paamiuniinnissaq.

-Kommunalbestyrelsimi aaliangiupparput, september-mi innuttaasut ataatsimiisinneqaqqissasut, ilinniartitsisussaaleqineq nangeqqillugu oqaluuserineqarniassammat, Lars Sørensen naggasiivoq.