Paamiuni borgmester isumalluarpoq

Paamiuni raajalerineq aallarteqqilerpoq. 1990-ikkut aallartilaarnerani raajaleriffik siulleq matuvoq, taamatumalu kingorna kommuni aningaasarissaarpallaarsimanani, massakkullu pissutsit ilorraap tungaanut aallassasut, borgmesteri isumalluartoq Lars Sørensen oqarpoq.

Paamiuni suliffissuaqarneq 1967-mi aallartimmalli saarulliit, raajat, pujooriveqarnerlu ingerlanneqartarsimapput. Ukiut 15-it matuma siornali raajalerineq unitsinneqarmat suliffissaarusimaneq kommunimi ajornartorsiutaavoq, innuttaasut ikigisassangitsut allamut nuutariaqarsimallutik, massakkullu raajalerineq aallarteqqinneqartussanngorpoq.

Raajanik tulaasuineq ingerlallualerpat sulisut 150-it missingi sulisorineqalissasut fabrikkip pisortaa Gorm Diernesse oqarpoq. Paamiut kommunianilu borgmester IA-mmersoq Lars Sørensen isumalluarpoq.

-Oqartariaqarpugut kommunip tungaaniit annertoorujussuarmik isumalluarfigaarput. Suliffissuaqarnikkut aalisarnikkullu allannguineq annertoorujussuaq pisussanngortoq naatsorsuutigaarput, Lars Sørensen oqarpoq.

Kommunimilu aamma ukiunut arlaqartunut pilersaarusiorsinnaalernissaq isumalluarfigineqalerpoq, sanaartugassat anginerit, soorlu suluusalinnut mittarfittaarsinnaaneq.

Raajaleriffik ammarneqarpat suliffissaaleqisut affaananngussapput kommunilu ukiumut 3 millioni koruuninik isertitaqarnerulissalluni.