Paamiuni angut aallaammik qunusaarisoq iperagaavoq
Paamiuni angut ippassaq arfininngornermi inuit tungaannut illullu tungaannut aallaammik umertaqattaarmat politiiniit tigusarineqartoq maanna aniguisitaasoq, politiiniit oqaatigineqarpoq.
Angut ippassaq nalunaaqutaq tallimanut iperagaavoq, tamannali isumaqanngilaq pisoq pillugu politiit sulinerat unittoq.
Kalaallit Nunaani politiini pigaartut ittuat Preben Kleist KNR-mut taama erseqqissaavoq.
- Suliaq nangillugu misissoqqissaassavarput, pigaartut ittuat oqarpoq.
Paamiuni politiit ippassaq kalerrinneqarput, angut aallaaserluni illoqarfimmi angalaartoq inuillu tungaannut aammalu illunut umeqattaartoq.
Kingunitsianngua angut tigusarineqarpoq, tamatumalu kingorna politiit misissorpaat pisup parnaarussaanermik malitseqartussamik eqqartuussivilersuunneqarnissaanut tunngavissaqarnersoq.
Ualimulli Sermitsiaq.AG-mut politiini pigaartut ittuat Brian Thomsen oqarpoq, politiit pisumut tassunga tunngatillugu arlalinnik misissuereerlutik, inatsit tunngaviusoq naapertorlugu angutip killisiorneqarnissaa tunngavissaqanngitsoq iperagaassasorlu aalajangersimallutik.
