Paamiuni akileraarutikinnerulissapput
Paamiut Kommuneata 2008-mi aningaasartuutissatut missingersuutit kisiisa akuersissutiginngilaat, akileraarutilli procentimik ataatsimik appartinneqarnissaa aamma anguvaat.
Naak pilersaarutit nutaat arlaqaraluartut, soorlu naluttarfeqalernissaq pilersaarutaasoq, tamanna anguneqarpoq.
Akileraarut maannakkut 45 procentiusoq 2008-mi 44 procentinngussaaq.
Isertitassatut missingersukkat 3 millioni koruuninik Paamiuni qaffariarnissaat missingersorneqarpoq, aningaasartuutit 7 millioni koruuningajannik qaffariarnissaat taamaallilluni missingersuutigineqarluni.
Qaffariaatinut peqqutaaqataapput kommunit kattussuunnissaannut aningaasartuutissat, mittarfittaarnermi aputaajaanermut aningaasartuutissat kiisalu inuussutissarsiornermi siuarsaanissamut aningaasaliiniarnerit.
Meqqanut inuusuttunullu ingerlatsivimmi atuarfiit Paamiuni Arsummilu aningaasaliissutit qaffariaateqarput, ilinniartitsiut akissarsiaat malunnaataalluartumik tassani qaffariaateqarlutik.
