Paamiuni aamma killilersuisoqalerpoq
Qanermut assiaqutit coronapassillu atornissaa, tamakkuupput ullumi pingasunngorrnermi jannuaarip 19-ianiit Paamiuni killilersuutitut aamma atuutilertussat.
Paamiuni maanna tunillaassuuttoqarpoq, tuniluunnerup pilerfianik ilisimaneqanngitsumik.
Taama naalakkersuisut tusagassiutinut allagaqarlutik nalunaarput.
Tassalu imaappoq ullumikkut pingasunngornermi ullaakkut arfinerniit atuutilersumik Paamiuni aqqaneq marlunniit qummut ukiullit ininut kikkunnit tamanit iserfigineqarsinnaasunukarunik covid-19-imut akiuussusersimanermut, siusinnerusukkut tunillanneqarsimanermut imaluunniit covid-19-mut misissorneqarsimanermut uppernarsaammik takutitsissamik piumasaqaataalerpoq.
Taamatuttaaq aqqaneq-marluk qaangerlugit ukiullit tamarmik kikkunnit tamanit iserfigineqarsinnaasuni kikkunniillu tamanit ilaaffigineqarsinnaasuni ilaaniarunik qanermut assiaqut aamma kiinnamulluunniit assiaqut atussavaat.
AAMMA ATUARUK Tamaat isigalugu: Coronavirus pillugu killiffik
Taavalu tamanit ornigarneqarsinnaasuni isersimasinnaasut amerlanerpaaffissalerneqassapput. Tassa imaappoq qatserisartut amerlanerpaaffiusinnaasutut akuerisaasa affaannaat isertinneqarsinnaassapput.
Paamiut saniatigut inoqarfiit killilersuiffiusut tassaapput: Narsaq, Ilulissat, Kangerlussuaq, Maniitsoq, Nuuk, Qasigiannguit, Upernavik, Tasiusaq, Upernavik Kujalleq, Nutaarmiut, Nuussuaq, Innaarsuit, Naajaat, Aappilattoq, Kangersuatsiaq Kullorsuarlu.
