Paamiuni aallaasersortoq inuinnarnit tigusaasoq
Kalaallit Nunaanni Politiit Paamiut umiarsualivianni aallaasersortoqarneranik arfininngormat unnukkut arfernup qaangerlugu tanneq pingasunngulersoq nalunaarfigineqarput.
Politiit marluk pisoq misissorniarlugu ornigupput, angullu aalakoortoq aallaasersortoq paasillugu.
AAMMA ATUARUK Maniitsumi aallaasersortoqarnera seqqulutsitsisoqarneralu innuttaasunut toqqissisimajunnaarsitsisoq
Angut taanna sapiillisaarmat politiit aqqusineq matugallartariaqarsimavaat.
- Angut quimiit anivoq sakkutuunullu politiinullu seqqortaarsinnaalluni nillialluni. Aamma Politiit marluk oqaluunnerini seqqorpaluk tusaavarput. Politiinut umersimanersoq silaannarmulluunniit seqqorsimanersoq naluarput, Politiit pigaartuat, Johan Westen KNR-imut oqaluttuarpoq.
Politiit pinasuartumik orniguttartui arfinillit Nuummiit Paamiuliartinneqarput. Paamiuni nuissat appasippallaarnerat peqqutaalluni qulimiguulimmik timmisinnaannginnamik Issittumi Sakkutooqarfiup umiarsuaanut Knud Rasmussenimut ilaallutik unnukkut qulinut Nuummit aallaput.
Akuleruteqqusinngitsut
Pinasuartumilli orniguttartut Paamiunut tikimmata aallaasersortoq inuinnarnit Politiit aqqusineq matusaat soqutiginagu ingerlasimasunit quimullu isertunit tigusarineqarpoq.
Politiit angut unnuaq ataatsimut qiteqqutilivissoq tigusaraat. Pisoq iluatsittumik inerneqaraluartoq, inuinnaat Politiit sulineranni akulerunnerat kissaataasimanngikkaluarpoq.
- Pisuni taamaattuni ulorianartorsiorfiup iluani angalaarneq naleqquttuunngilaq. Inuimmi imminnut ulorianartorsiortissinnaapput, taakkulu pinngitsoortikkusuppagut ajorluinnartumimmi pisoqarsinaavoq, Johan Westen oqarpoq.
Politiit angut suli killisiunngilaat, inoqarfiulli iluani seqqortaarsimasutut pasineqarnissaa naatsorsuutigaat, inuillu tungaannut umersimanersoq misissorneqassaaq.
