Paamiuni aallaasersortoq

Unnummut marlunngornerup unnuani Paamiuni aallaasersortoqarpoq. Pisoq ima ulorianartigaaq Nuummi politiit ikiuukkiartortinneqarsimallutik sulilu angut aallaasersortoq tigusarineqanngilaq.

- Pisoq aallartippoq angerlarsimaffimmi eqqissiviilliortunut politiit ornigummata. Kisianni taava angut pineqartoq kamanneruleriaannarpoq kingunitsianngualu politiip tungaanut aallaammik eqqarluni, politimestereqarfimmi vicepolitiinspektør Niels Nyvang KNR.gl-imut taama oqarpoq.

- Angut pineqartoq kingorna silami aqqusinermukarpoq arlaleriarlunilu eqqarluni. Qujanartumik eqqartoqarnerani inunnik eqqortittoqanngilaq. Angut illoqarfiup silataanut qimaasimavoq maannalu suli illoqarfiup kangiatungaaniilluni, Niels Nyvang oqarpoq.

Angutip illoqarfik qimakkamiuk atorsimavaa tujuuluk aappaluttoq, qarleqarani kameqaranilu.

Nuummi politiit ikiuukkiartortitsipput Paamiunullu apuutereerlutik. Politiit Paamiuni innuttaasut qinnuigaat mianersorluinnaqqullugit aamma angutip qimaaffiata tungaanukanngilluinnassasut kajumissaarlugit.

Politiit ilanngullugu nalunaarutigaat aallaasersortup aqqa. Tassaavoq Hilmer Ibsen Christensen 1968-mi inunngortoq.

- Angut taanna politiinit ilisimaneqareerpoq siornatigullu unnummut pisumut assigusumik pinerluuteqareernikuulluni. Ulorianarluinnartuuvoq naluarpullu qanoq ilioriataarsinnaanersoq, Niels Nyvang oqarpoq.

Taassuma oqaatigiumanngilaa politiit qassit Paamiunukartinneqarsimanersut. Kisianni oqaatigaa amerlassusaat suliassamut naapertuuttoq.

Pisoq pillugu politiit kingusinnerusukkut nalunaaruteqaqqissallutik ilisimatitsissutigaat.