Paamiormiut: Naatitanik suliuniuterput tapersersorsiuk
Paamiuni salaatinik tunisassiornerup filmiliarinissaanut Bent Olesen aamma Michael Leitner aningaasassarsiorlutik katersileruttorput. Taakku nittartagaq aningaasaliinermik ingerlataqartoq Boomerang.dk suleqatigalugu aningaasanik katersipput. Video takuuk.
Salaatinik tunisassiorluni suliniut nammineerlutik misiligarpaat. Paamiunilu naatsitsisartut taakkau ima nassuiaapput:
- Ukioq kaajallallugu salaatinik nutaanik naatitsisarpugut. Illup iluani salaatinik naatitsineq iluatsilluarparput, tamakkulu allanut avitseqatiginnissutigerusuppavut videuliorlutalu takusassiaralugu, taakku oqarput.
Bent Olesenip aamma Michael Leitnerip neriuutigaat inuit amerlasuut Boomerangimut isertartut amerlanngikkaluanik tapiissuteqarumaartut. Taasa amerlanngikkaluanik tapiissuteqartitsisarluni katerseriaaseq maanna atugaaqisoq nuannarineqaqisorlu atorlugu.
Naatitsisarneq pillugu filmiliorusupput
Tamatuma tv-kkut allakaatitassiarineqarnissaa imaluunniit dvd-nngortinneqarnissaa neriuutigaat, tamatumani Issittumi ukioq kaajallallugu kalaallit naatitanik qanoq naatitsisinnaanerat samminiarneqarluni. Filmi qallunaatuujullunilu kalaallisut suliarineqassaaq tuluttullu oqaasertalersorneqarsinnaanera isumaliutigaat.
Naatitanik naatitsisartut taakku aamma oqaatigaat, filmi piviusunngussappat KNR-TV-mi takutinneqarnissaanik neriorsorneqarsimallutik.
