Paamaarussisoqarnera Jens B. Frederiksenip qatsuppaa

Apeqquteqartup paaserusuppaa apeqqutigisani akiuminaatsutut taaneqarsinnaanngilluinnartoq sooq ukiup affaa atorlugu akissuteqarfiginiarneqarsimanersut. Aammattaaq § 37 naapertorlugu apeqquteqaatip allap qaammatini sisamani akiniaasaarneqarsimanera Jens B. Frederiksenip naammaginngilluinnarpaa, apeqqutigisamilu iluamik akineqartarnissaat piumasaralugu.

-Paasisinnaanngilluinnaqqissaarparar qanoq ilillutik Naalakkersuisut piffissaq taama sivisutigisoq atorsinnaaneraat apeqqutit ajornanngitsuaqqat akinissaannut taamaattumik piumasarivara eqqortumik akineqaqqullunga suna pissutaanersoq taama paamaarussinermut. Qulaaniittumi apeqqummi takuneqarsinnaasutut kissaatiginngilara akineqarnissara, sivisuallaamik akiniarnermut pissutaasoq ”kukkusumik allakkap suliarineqarsimanera”, Jens B. Frederiksen nassuiaavoq.

Apeqqutinut akissuteqarnissamut piffissaliussap akuersaarneqarsinnaanngilluinnartumik qaangiisoqarsimaneranut tunngavilersuutigineqartut ikkattuararsuit kingorna saqqummiunneqarput. Frederiksen apeqqutigaa apeqqutit akiniarnerisa sivisussusaata "kanngunarluinnartuunera" Naalakkersuisut isumaqatigineraat,  aammalu akissuteqarnissamik paamaarussinikkut "ataqqinninngitsumik iliornertik" Naalakkersuisut utoqqatsissutiginiarneraat.

-Apeqqut normu 184 eqqarsaatigalugu, apeqqutima taasuma iluaniippoq allagaatinut takunnikkumallunga qinnuteqaatiga. Piumasaqaatit taamaattut Pisortat ingerlatsinerat pillugu paasitinneqarsinnaatitaaneq pillugu Inatsisartut inatsisaanni nr. 9-mi, 13. juni 1994-imeersumi § 16 imm. 2 naapertorlugu – akuerineqartussaapput itigartinneqarlutilluunniit ullut qulit iluanni. Maannakkut ullut 120-t ingerlareerput sulilu utaqqivunga. Eqqarsaatigaara taamatut akuerineqarsinnaanngitsumik utaqqisitaanera Inatsisrtut ombudsmandianut naammagittaalliutiginiarlugu, Jens B.-p apeqqutini taama tunngavilersorpai.