Paamaarussineq soraarsitsinermik kinguneqarpoq
Kalaallit Illuutaasa inunnik isumaginninnermut sullissinerini ukiorpassuarni ingerlanneqartartoq aningaasanik tapiiffigitittarunnaaraluartoq qanoq iliuuseqarfiginiarlugu, qallunaat inunnik isumaginninnermut ministeriata, Karen Hækkerup sapaatip akunnera kingulleq aningaasaliivoq, ukiuni tulliuttuni pingasuni 13,4 million koruunit atugassanngorlugit.
Taamali kingusitsigisukkut aningaasaliiniarneq Kalaallit Illuinut kingunerlutsitsereepoq.
- Aalborgimi Kalaallit Illuannut tamanna ima kingunerluppoq, allaat inunnik isumaginninnermut sulisorput soraarsittariaqarsimallutigu aamma ornittagaq atorunnaarsittariaqarsimallutigu, Aalborgimi Kalaallit Illuutaanni pisortaq Jan Thrysøe oqarpoq.
Aappaagumut aningaasanik atugassanik qinnuteqarsinnaaneq suli Kalaallit Illuinut anngunneqanngikkaluartoq, taamaattoq Kalaallit Illui Danmarkimiittut paasiniaavigisagut oqarput siunissaq maanna isumalluarnarsisoq.
Inuit Ataqatigiit folketingimi ilaasortaatitaata, Sara Olsvigip Danmarkip inunnik isumaginninnermut ministeriat, Karen Hækkerup novembari aallartittoq naapisimaareeraalu, tapissutit aaqqinneqarput.