Paakitsumi sulisut angerlararput

Nukissiorfiit nittartakkaminni taama allapput.

Sulineq aggustimi/-septembarimi ingerlanneqaleruttormat sulisut 133-usimapput - amerlanersaat Islandimeersuullutik, qaarusuliortullu Slovakiameersuullutik. Taakku saniatigut sulisut ilaat nunatsinneersuupput Polenimeersuullutillu. Nunallu allamiut suli amerlanerit Paakitsumi aasaru sulisorineqartussaapput. Napparusersuinerit suliffeqarfimmit Kroatiameersumit ingerlanneqartussaapput, nukissiorfiillu kaavittui sarfaliortut Østrigimit tikisinneqartussaallutik, Nukissiorfiit ilisimatitsipput.

Nukissiorfissami sulineq immikkoortuni ataasiakkaani piffissakkut pilersaarutinit siuarsimanerulaarput.

- Qaarusuliap kilometeri ataaseq ukiup naanerani sinnersimavaa, pilersaarutit malillugit takissusissaata 20 %-ia. Nukissiorfiit suliami nakkutilliisuutitaa Ole Kristensen nassuiaavoq.

Taakku saniatigut umiarsuaaqqanut talittarfiliortoqarsimavoq, napparutillu 138-usussat toqqavissaat 113-it naammassineqarsimallutik. Sulineq qaammatit pingasut qaangiuppata nangeqqinneqassaaq.

Erngup nukinganik nukissiorfiup sarfamik pilersuilernissaa novembarip ulluisa aallaqqaataanni 2012-imi naatsorsuutaavoq.