Ozonilagip putua alliartorunnaarpoq
Sikuijuitsoq Kujalliup nalaani ozonip putua ukiorpassuarni alliartuinnarsimagaluartoq maanna alliartorunnaarsimasoq, ilisimatuut oqaatigaat. Taama allaaserisaqarput BBC.
Ozonlagi putoqartoq 1986-mi paasineqarpoq, kingornalu nunat assigiinngitsut akornanni isumaqatigiissuteqartoqarnera pissutaalluni CFC-gassinik ulorianartunik aniatitsineq annikillisimavoq.
Sikuijuitsoq Kujalliup nalaani ozonip putua alliartorunnaarsimasoq ilisimatuunit marlunnit paasineqarpoq, taakkulu USA-p illoqarfiisa pingaarnersaanni Washingtonimi ataatsimiinnermi saqqummiuppaat.
-Siunissami nalinginnaasumik ozonlageqarsinnaanerput isumalluarfigisorujussuuvara, imaassinnaavoq uanga inuunerma nalaani tamanna pinavianngitsoq, ilissili immaqa inuunissi nalaani, dr. David Hofman oqarpoq.
