Ove Karlip oqaaserisai danskit aviisiata apeqquserpai
Naalakkersuisunut ilaasortat marluk nalunaarummik nammineq kajumissutsimik atsiugassamik atsiorsimannginnerat erseqqissaatigaa, aamma Inatsisartunut ilaasortanit 31-iusunit 17-t aningaasatigut soqutigisatik pillugit tamanut paasissutissiissutigisimanngilaat.
-Inuiaqatigiinni Kalaallit Nunaattut mikitigisuni inuit malunnaatillit assigiinngitsunik suliaqartuunerat akuerineqartariaqarsoraara. Kisianni - allaaserisatulli - aamma pissaanermik tigummiartut tamakkiisumik ammasuunissaat pingaaruteqarpoq. Aningaasatigut soqutigisat pillugit nalunaarutit Namminersorlutik Oqartussanit tamanit pissarsiarineqarsinnaasut tamatuminnga siunertaqarput, pingasunilli sanngiiffeqarput: Immersuineq ajortut amerlapput, aapparisat assigisaallu ilanngunneqarsimanngillat, aammalu atorfilittat ilaatinneqaratik, Politikenip nunanut tamalaanut tunngasunut aaqqissuisua Michael Jarlner knr.-gl-imut oqarpoq.
Kuupik Kleistip Ove Larl Berthelsenillu aatsitassarsiuutileqatigiiffiutaaannik, kingorna siulersuisunut ilaasortaaffimminnik nuliaminnut tunniussaqarfigisaannik, aviisip soqutiginnilersimanerata kingorna, Ove Karl Berthelsen Politikenimut oqaaseqarpoq. Aviisi isumaqanngilaq Naalakkersuisunut ilaasortaasut taamatut iliorsimanermikkut attuumavallaarnerminnik ajornartorsiuteqarnertik iluarsisinnaagaat, tamannali Berthelsenip Kleistillu isumaqatiginngilluinnarpaat.
-Ammasuunissamik piumasaqaatip suliffiup avataani inuunermut ajoqusiisinnaaneranik ernumasoqarnera paasisinnaavara. Pitsaaqutilli ajoqutissanit amerlanerupput. Sverigemi allaat akileraarutinut akiliutit ilannugllugit saqqummiunneqartarput, tamannalu ajorineqarani, taamaammat ajortussaanngikkaluarpoq. Kangiani Afrikamilu nunani aatsitassaqarfiulluartuni aatsitassat mianersornartuuneri takuneqarsinnaavoq. Islandilu qiviaraanni sukkasuupilussuarmik ajutooratarsinnaaasut takuneqarsinnaavoq, Michael Jarlner erseqqissaavoq.
Michael Jarlnerip allaaserisaa uani atuarsinnaavat: http://politiken.dk/debat/profiler/jarlner/ECE1890168/ja-gu-skal-groenland-da-vaere-mere-aabent-end-danmark/
