Ove Karlip nunanit allaneersut aningaasarsiaasa ikinnerpaaffissaat aalajangerusuppaa
Taama iliorniarput sulisartut illersorneqarnissaat pingaartikkamikku. Radioaviisimiilli apersuinitsinni ersarissumik akissutissarsinngilarput, soorlu Alcoap ingerlatsivissuillu annertuut namminneerlutik nunat allamiut akikinaarlugit sulisilissappatigit, Naalakkersuisut tamassumunnga qanoq isumaqarnersut imaluunniit piumasaqaateqassanersut.
Tassalu tamannarpiaavoq ingerlatsivissuit annertuut pillugit Naalakkersuisut nalunaarusiaanni allassimasoq aamma inatsisissatut siunnersuusiaanni suliarineqarsimasoq. Taasanilu siunnersuutitut allassimavoq, nunat allamiut Nunatsinnut suliartortut isumaqatigiissusiorfigineqassasut, akissarsianut atorfinitsitsisarnernullu nunarsuatsinni allani atortakkat assigalugit. Tassalu tamanna ima paasineqassalluni, nunat allamiut nunaminni atugarisaat naapertorlugit isumaqatigiissusiorfigineqassasut.
Nunat allamiut atugarisaasa annikillinissaannik oqalunneq eqqunngitsuusoq, Inuussutissarsiornermut Aatsitassanullu Naalakkersuisoq, Ove Karl Berthelsen oqarpoq.
- Naalakkersuisunit qulakkeerniarparput, suliffimmi atugassarititaasut avatangiisitigut, peqqinnissakkut aammalu naliginnaasumik sullivimmi atugassarititaasut allat, maani Nunatsinni atugassarititaasunit ajornerunnginnissaat. Nunarsuatsinnilu allani akissarsiaritsinneqartartunut naleqqiullugit Nunatsinni annikippallaannginnissaat anguniarparput, tassa Nunatsinni akissarsiaritinneqartartunut naleqqiullugit taakku nikigavallaannginnissaat anguniarparput.
Akissarsiat Nunatsinnut naleqquttuunissaat taava qanoq anguniassavisigit?
- Taassuma suliap assigiinnginnissaat anguniarlugu tamanna aasap ingerlanerani suliarissavarput. Tassami suliassanik annertoorsuarnik allartittussanik suli qinnuteqartoqanngilaq. Taamaattumi sinaakkutit suut allallu isumaqatigiinniarnissamut suli tunngavissaqannginnatta. Taamaattumi nunarsuatsinni allani atuuttut aallaavigissallutigit piareersarpugut.
Inuussutissarsiornermut Aatsitassanullu Naalakkersuisoq, Ove Karl Berthelsen oqarpoq.
Nunat allamiut Nunatsinnut suliartortinneqartussat sulisinneqalernerini akilerlunneqassannginnissaat Inatsisartuni partiit, Inuit Ataqatigiit aamma Siumukkunni amerlanerussuteqartut kissaatigaat.
Inuit Ataqatigiinnit oqaatigineqarluni, akuersaarneqarsinnaanngitsoq Naalakkersuisut namminneerlutik akissarsiat atorfinitsitsinerillu qanoq isikkullit aalajangiiffigissagaat.
- Tunngaviatigut partiit eqqaasatit isumaqatigaagut. Taamaattumilluuna tamassuma ikkutsinneqarnissaa Naalakkersuisunit soqutigigipput, tassalu qulakkeerissinnaassuseqarnermut akulerussinnaaneq. Tassalu partiit piumasaat aallaavigalugit qulakkeerinnissinnaassalluta.
Inuussutissarsiornermut Aatsitassanullu Naalakkersuisoq, Ove Karl Berthelsenip aamma oqaatigaa nunat allamiut Nunatsinnut suliartortut atugarisaasa appartinneqannginnissaat Naalakkersuisunit soqutigineqarmat.
Ingerlatsivissuit annertuut pillugit Inatsisartut ukiamut ataatsimiinnissaanni siunnersuut tamakkiisoq saqqummiunneqassaaq.
Maniitsumi aatsitsivimmik aallartitsisoqassappat, taassuma sanaartulernerani nunat allamiut akikitsullu Alcoap atussallugit siornali oqaatigisareerpaa. Ove Karl Berthelsenillu oqaatigaa, Alcoa oqaloqatigineqartarmat sulisartoqarnerlu pillugu isumaqatigiinniartoqarsinnaalluartoq oqaatigalugu.
