Ove Karl: Suliffeqarfissuit qimarratsissanngilagut

- Suliffeqarfissuarnut aatsitassarsiorniartunut piumasaqaatigut annertusineqassappata tamanna ulorianarpoq. Taama oqarpoq Aatsitassaqarnermut Naalakkersuisoq, Ove Karl Berthelsen, Siumup Inatsisartuni ilaasortaasa piumasarereeraallu, aatsitassanut politikkip Inatsisartuni immikkut ittumik ataatsimiinnermi allanngortinneqarnissaa.
Allattoq Apollo Jeremiassen
januaarip 30-at 2012 12:22

- Ulorianartua uaniippoq, taamatut iliuuseqassagutta taava tatigineqassuserput aammalu tatiginartutut nunanit allanit isigineqarnerput, ukiorpassuarni pilersikkiartorsimasarput, sequminneqarluni  ulorianartorsiortinneqalersinnaammat, Aatsitassanut Naalakkersuisoq taama oqarpoq.

Tusagassiutinut nalunaaruteqarlutik Siumup Inatsisartuni ilaasortaasa erseqqissaatigaat, aatsitassarsiornernut atatillugu Naalakkersuisut suliffeqarfissuarnut piumasaqaataat sakkukippallaartut. Siumup siulittaasua, Aleqa Hammond ima tunngavilersuivoq.

- Tassalu pisuusutitsinninngaanniit Nunatta pissarsiassaasa annertussusissaa erseqqissaassutigineqartariaqartutut isigaarput, aatsitassarsiorumallutillu tikittussat CO2-mik aniatitsinerannut akiliisussanngortinneqarsimannginnerat pissusissamisoorsorinatigu erseqqissaasoqartariaqartoq aammalu isumaqaratta Nunatta avataaninngaanniit tikittunik sulisoqarnermut politikki erseqqarluppallaaqimmat, tamassuma erseqqissarneqarnissaanik piumasaqarluta, Siumup siulittaasua, Aleqa Hammond oqarpoq.

Suliffeqarfissuarnut annertunerusumik piumasaqarnerup kingunerisinnaavaa, taakku Nunatsinni aatsitassarsiornissaminnut nagaalernari, taama isumaqarpoq, Aatsitassanut Naalakkersuisoq Ove Karl Berthelsen nangillunilu oqarluni inuiaqatigiinnut taama pingaaruteqartigisup suliarinerani mianersortariaqartugut.

- Aamma isumaqarpunga massakkut taamatut alloriarnernik suliaqarnerput tassaasoq, avatangiisinut peqqinnissamullu aammalu inuaqatigiinnut aningaasatigut iluaqutaanerpaanissaanik suliaqarnerput aallaaveqartoq, Ove Karl Berthelsen taama oqarpoq.

- Innuttaasuni oqallinneq Naalakkersuisup mianersoqqussutigaa, tamanna pissusissamisoortutut isiginngilarput. Nunatsinni pisuussutaatigut pillugit innuttaasuusugut oqartussaanerpaavugut. Tamaattumillu tamanna oqallisigilluartariaqarlutigu nalilersorluartariaqaripput, Siumumit isumaqarpugut, Aleqa Hammond oqarpoq.

Aatsitassanut Naalakkersuisup eqqaamaqquaa, Naalakkersuisut maanna siunnerfigisaat Siumup Naalakkersuinikkut siuttuunerisa nalaannili, 2009-mi akuersissutigineqartoq ingerlanneqarmat. Ove Karl Berthelsen oqarpoq nangillunilu.

- Illuatungiuliuttuunerup aqqani aallaaveqartunik aammalu sunniutaasinnaasunik eqqarsanngivilluni siunnersuuteqarnerup iluaqutissatsiarsuagut ajoqusersinnaavaat. Aatsitassaqarnermut Naalakkersuisoq, Ove Karl Berthelsen oqarpoq.

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.

Aamma atuaruk