Ove Karl: Periarfissat killeqanngillat
Great Greenlandip atisaliaanik takutsinerit, kalaallit mamartuliaannik sassaalliinerit ilaatigut atorneqarput nunatta Kinamut niuernera nukittorsarniarlugu Kinami takoqqusaarnermi. Kinamiut naammagisimaarinnimmata Ove Karl Berthelsen neriullualerpoq.
- Kalaallit Nunaanneersut kinamiullu inuussutissarsiornikkut suliaqartut akornanni toqqaannartumik attaveqarnermik pilersitsinerup iluatsinnera assorsuaq iluarisimaarpara. Kinamit takornariat aggersarniarlugit qeqqanilu Naalagaaffimmut avammut tunisatta annertusarniarlugit siunissamut tunngatitanik iliuusissanik amerlanernik ukiuni takkuttussani ingerlataqarnissarput erseqqarissumik anguniagaraara. Maannakkut Kina periarfissat nunagivaat, uagullu tamatuma atorniarnissaa suli pikkorinnerulerfigisariaqarparput. Kinami niuerfeqarfik annertuupilussuuvoq, periarfissallu killissaqaratik, Ove Karl Berthelsen Kinamiinnerminik unnersiorpoq.
Naalakkersuisoqarfimmiit oqariartuutigineqarpoq imermik nilannillu Kinamut tunisassiorsinnaanermut periarfissaq. Kinami niuertut imermik qaammarimmik minguitsumik ussiitinneqarput aammalu Arctic Velvet whisky aamma vodka sermersuarmiit akusat inororsaarutigineqarlutik. Siunissap takutikkumaarpaa Kinami imigassat nilannik nunatsinneersunit nillarsaaserneqartalissanersut.
