Ove Karl: Isornartorsiuineq tunngavissaqanngilaq

Aatsitassarsioqatigiiffiup London Miningip, avatangiisinik misissuisitseqqaarnani aamma innuttaasunik tusarniaaqqaarnani saviminissamik piiaanissamut pilersaaruteqarnera, Avatamit isornartorsiorneqarpoq. Kisianni tamanna ilumuunngitsoq Ove Karl Berthelsenip oqaaseqaammini oqaatigaa.

Taassuma aamma oqaatigaa, Isukasiani aatsitassarsiornissamut pilersaarummut qinnuteqartoqaranilu suli akuersissuteqartoqanngitsoq. Taamaallaat misissueqqissaarnissamut akuersissuteqartoqarsimavoq, maannalu aatsitassarsioqatigiiffik avatangiisinut tunngasunik aamma pilersaarutip inuiaqatigiinni imminut akilersinnaasumik ingerlanneqarsinnaaneranik misissuileruttorpoq. Taamalu Aatsitassarsiornermut inatsimmi aalajangersakkat maleqqissaarneqartut oqaatigalugu.

- Misissuinerit pineqartut naammassineqareerpata innuttaasunik akuutitsiniarnertaa aallartinneqassaaq, Ove Karl Berthelsen oqarpoq. Ilanngullugulu oqaatigalugu aatsitassat pillugit inatsisip maleqqissaarneqarnissaa Naalakkersuisut politikerigaat.

Inatsimmi piumasaqaatit naammassineqarsimatinnagit aatsitassarsiornissamut akuersissuteqartoqarnavianngitsoq ilanngullugu erseqqissarpaa.