Ove Karl Berthelsen: Qimuttut ajunngitsumik pineqartussaapput

Taassuma erseqqissarpaa qimuttoq qimuttutut atugassaasoq, kalaallillu piniartutut kulturiannut ilaasoq, aamma issittup silaani isseqisumi uumasinnaanissamut naleqqussarsimasoq.

- Taamaattorli uumasunut illersuiniarnernut tunngasunut inatsisit atuuttut soorunami malinneqassapput, Ove Karl Berthelsen oqarpoq.

Qimuttut ajunngitsumik pineqarlutik uumasuutigineqassapput, ullut tamaasa nerisassaqartinneqarlutik imigassaqartinneqarlutillu aamma silap anorillu allanngorarnerinut oqquiffissaqassallutik. Aamma qimuttut napparsimalerpata, uumasut nakorsaat attaveqarfigineqartariaqarpoq, Ove Karl Berthelsen oqarpoq. Taassumali ajuusaarutigaa Nunatsinni qimuttut 21.000-iusut, Namminersorlutik Oqartussani atorfilinnit uumasut nakorsaannit, taamaallaat killilimmik nakkutigineqarsinnaammata.

- Qimminik piginnittup akisussaaffik annertooq tigummivaa - qimminuinnaq tunngatinnagu - aammali innuttaasunut allanut takornarianullu tikittartunut tunngatillugu. Qimmip saluppallaartup ataatsip imaluunniit qimmip kalunnernut uiguleriiaanut ilattoorsimasup, suliassanngortinneqartup ataatsip, Nunatta nunani allani tusaamaneqarnera innarlersinnaagaa, naalakkersuisunut ilaasortap oqaatigaa. Taamaattumik kommunit qimuttunik nakkutilliinermik pimoorusseqqullugit, aamma illoqarfinni nunaqarfinnilu ataasiakkaani qimminik nakkutilliisussanik toqqaaqqullugit ilinniartitseqqullugillu kajumissaarneqarput.