Ove Karl Berthelsen: Marloqiusamik pissusilersunngilanga
- Naalakkersuisunut ilaasortanngorama siulittaasunnut Kuupik Kleistimut piaarnerpaamik nalunaarutigivara assigiinngitsut suut piginneqataaffiginerlugit suullu siulersuisuni ilaasortaaffiginerlugit, Ove Karl Berthelsen oqarpoq, nangillunilu:
- Piginneqataaffittut inissisimaffikka tamaasa tuninissaat soorunami soqutiginngilakka, aamma naalakkersuisooreeruma inuuneqartussaavunga. Tamakku pissutigalugit Naalakkersuisut siulittaasuannut ilisimatitsivunga, taassumalu qanoq iliuuseqarfiginissaat akisussaaffigissavaa, Aatsitassanut naalakkersuisoq Ove Karl Berthelsen oqarpoq.
Maniitsup taamani borgmestererisimasaa Søren Lyberth peqatigalugu suliffeqarfik assartuussisussaq, Kamma ApS, 2008-mi piginneqataaffigilersimagaa, Radioaviisimi ippassaq oqaluttuaraarput.
Ove Karl Berthelsen isumaqarpoq Inuussutissarsiornermut Aatsitassarsiornermullu Naalakkersuisutut inissisimanini, taamalu Alcoap aatsitsiviliorsinnaalernissaanut akisussaasut ilaattut inissimanini, saniatigullu suliffeqarfiutilittut inissisimanini marloqiusamik pissusilersortutut isigineqarsinnaanngitsoq:
- Suliffiup ulluinnarni ingerlanneqarneranit tunuarnikuuvunga tunuaavillunga, siulersuisunullu ilaasortaanngilanga. Taamaammat ulluinnarni ingerlanneqarnerani oqaasissaqartitaananga, Aatsitassanut naalakkersuisoq oqarpoq.
Aningaasatigut soqutigisani politikkikkullu soqutigisani matumani akuleriissinneqanngitsut, Ove Karl Berthelsenip oqaatigaa:
- Uanga taamatut isumaqanngilanga, aamma taamatut suleriaaseqanngilanga. Soqutigisakka arlalippassuit taamaatinnikuuakka, suliffeqarfiit nammineq ingerlatakka matullugit. Naalakkersuinermi massakkut inissisimanera uannut akeqarpoq, aamma tamanna akuerinikuuara, kisiannili suu tamaasa iperarnissaannut piumasaqartoqassappat soorunami taanna nalilersorumaarparput, Ove Karl Berthelsen oqarpoq.
Qinikkallu tamarmik ammasuunissaat Ove Karl Berthelsenip aamma kaammattuutigaa, suliffeqarfiit piginneqataaffiit assigisaallu innuttaasunut ammasumik saqqummiunneqartarnissaat kaammattuutigalugu:
- Politikerit tamarmik, nunaqarfinnik aqutsisuninngaanniit, kommunalbestyrelsini ilaasortanut, Inatsisartunut ilaasortaninngaanniit naalakkersuisullu isumaqarpunga tamarmik taamatut periarfissinneqartariaqartut. Inuiaqatigiit takusariaqarpaat sukkut qanoq ittunillu soqutigisaqarnersut, Inuussutissarsiornermut Aatsitassanullu naalakkersuisoq Ove Karl Berthelsen oqarpoq.
