Ove Karl: Alloriarneq angeqaaq
Aatsitassanut Naalakkersuisoq, Ove Karl Berthelsen - Ove Kaali, Cairn Energyp nuannersumik nalunaareernerata kingorna, Kalaallit Nunaanni uuliasiorneq tassa aallartissava?
- Siusippallaaqaaq taama oqarnissaq. Qillerinerit marluk ingerlanerinnaani nassaarineqarsimasut taama isumalluarnartigisut nalilissagaanni neriulluarneq annertoorujussuaq pigisutut misigisimanarpoq, taamaalilluni uuliamik nioqqutissulersinnaanerup qanillinera soorluuna takuneqarsinnaalersoq, Ove Karl Berthelsen oqarpoq.
Uuliasiornermi pilersaarutigeriikkassinnut nassaartoqarnera sunniuteqassava?
- Massakkut qillerinerit suli ingerlapput, Maanna qulakkeerneqarpoq Qeqertarsuup Nuussuullu avataani uuliaqarfeqartoq. Pilersaarutigeriikkattali allanngortinnissaat naatsorsuutiginngilarput, pissangalluta utaqqissavarput qillereqqittoqarnerani uulia qanoq atsiginersoq paasissagaat, Ove Karl Berthelsen oqarpoq.
