Ove Karl allat aamma naammaginngilaat
Nipangersimanissarli Siumup akerleraa. Partii isumaqarpoq Ove Karlip aamma Jess G.p taama isumaqatigiinniarnerat tulluartuunngitsoq suliassat angisoorsuit pillugit inatsisissaq inuussutissarsiornermut ataatsimiititaliap suliarileruttormagu. Taamaammat Ove Karl Berthelsenip kaammattorpaat SIK-mik kisumaqatigiinniarnerit ingerlaannartumik unitsinneqassasut.
- Ove Karl Berthelsen-ip Jess G. Berthelsen-illu oqaloqatigiinnerminni isumaqatigiissutissamik imaluunniit tamanut atorsinnaasutut akuersaarnartissinnaasaminnik angusaat Inatsisartut Inuussutissarsiornermut Ataatsimiititaliaata sulinerminni aalajangiussaanik allaaneruppat qanormita iliortoqassava? Ove Karl Berthelsen-ip Jess G. Berthelsen-illu isumaqatigiissutaat Inatsisartut Ataatsimiititaliaata suliaannut salliutinneqarsinnaanngilluinnarmat soorunami Inatsisartut Ataatsimiititaliaata aalajangiussaa atuutsinneqassaaq, Karl Lyberth Siumup siulittaasuata tullia oqarpoq.
Taamatut isumaqatigiinniarneq inuussutissarsiornermut ataatsimiititaliap sulineranik suusupaginninnerusoq Siumut isumaqarpoq. Taakkumi isumaqarput kattuffimmik isumaqatigiinniaqateqarnissamut piffissaq tulluartuunngitsoq.
- Erseqqissaatigineqassaaq Naalakkersuisut Inatsisartunit pisinnaatinneqarnikuunngimmata inatsisissaq pillugu SIK-mut isumaqatigiinniarnissaannut. Aamma Naalakkersuisut suliniutinut angisuunut inatsisissaq pillugu kattuffimmik aalajangersimasumik isumaqatigiinniarnissaminnut inatsisitigut tunngavissaqanngillat. Taamaattumik Ove Karl Berthelsen-ip Naalakkersuisut sinnerlugit inatsisissaq pineqartoq pillugu SIK-mut isumaqatigiinnialersimanera kukkuneruvoq piaarnerpaamillu unitsinneqartariaqarluni, Karl Lyberth oqarpoq.
