Ove Karl: Ajugaassutaasoq soqutigineqassaqaaq
Ujaqqanik Nunatsinneersunik soqutiginarnerpaanik nassaartut ukiormanna ukiut 22-ssaannik akissarsisinneqarput. Aamma Inuussutissarsiutinut aatsitassanullu naalakkersuisup Ove Karl Berthelsenip oqaatigaa unammisitsisarneq iluaqutaasoq.
- Inuiaqatigiit ataatsimut soqutigisaannik iseqarluni oqaatigissagaanni nalitoorujussuuvoq inuit taamatut ujaqqanik katersaminnik assigiinngitsuninngaanneersunik nassiussisarnerat. Tassa tunngaviusumik ilisimassassat assigiinngitsut pinngorartarput. Taamaalillutalu nunatta immikkoortuini assigiinngitsuni aatsitassanik qanoq ittunik, qanorlu naleqarsinnaasunik nassaassaqarsinnaanersoq ilisimalertarparput, aatsitassarsiornermut naalakkersuisoq Ove Karl Berthelsen taama oqarpoq.
Ujaqqat nassiunneqartut ilaat misissueqqissaarnermik kinguneqartarput:
- Pingaartumik kujataani kuulteqarfiit assigiinngitsut nassaariortorneqarput. Ilaatigullu kuultisiorfimmik ammaasoqarneranik kinguneqarpoq kiisalu aatsitassarsiorfissamik pilersaaruteqartoqarpoq. Tassalu misissueqqaarnissamut qinnuteqaatit arlalissuit Ujarassiorimmi nassaarfiusimasut eqqaanni ingerlanneqartussat qinnuteqaatigineqartartut pilertarput, Ove Karl Berthelsen oqarpoq.
Nunatsinni ujarassiortartut ikigisassaagunanngillat, Ujaqqanimmi nassaaminnik nassitsisut ukiormanna 686-iupput.
Ukiormanna ajugaavoq Edvard Christiansen Qeqertarsuarminngaanneersoq, saffiugassamik sulfid-imik, aqerlumik, kuultimik aamma siilvimik akulimmik nassitsisoq. Taanna Kangersuatsiap kangiani Kangermi nassaarineqarsimavoq.
- Tassaana igaasariarnitta ilaani qanittuaqqamut pisuttuarama, innartorniakujullungaasiit. Taava tassa pisorujoorlunga nassaareriasaarpara, ajugaasoq Edvard Christiansen taama oqarpoq.
Ujarak nassaarineqartoq aatsitassarsiorfiit soqutigilluagassagaat Ove Karl Berthelsen ilimagaa.
Ajugaasup tulliatut 25.000 koruuninik akissarsitinneqarpoq Johannes Kristensen Upernavimmeersoq, normu 3-tullu 20.000 koruuninik akissarsitinneqartut marluupput, tassa Hans Jørgen Løvstrøm Nuummeersoq aamma Bendt Josefsen Kapisilinneersoq. Taakku saniatigut sisamat normu 4-tut tamarmik immikkut 5.000 koruuninik akissarsitinneqarput.
