OuterVision ukioq manna aamma iluatsilluarpoq

Ukioq manna OuterVirsion aallartilluarpallaanngilaq, pujornerami peqqutigalugu qitittartut Ilulissaniit Nuummukarsinnaasimanngillat. Tamannalu aaqqissuisunut suliassamik annertuumik tunisivoq. Aaqiiniarlunili suliniuteqarnermi ullualunnik kingusinaaraluartumik aallartinneq iluatsilluarpoq.

- Qitittartut Nuummukannginnerminni Uummannamiillutillu Ilulissaniissimapput. Katuamilu marlunngornermi aallartinnissaraluaq sisamanngornermut nikisissimavarput. Tamannalu tusagassiutinit angajoqqaaniillu tapersersorluarneqarnitsigut iluatsilluarpoq. Taamaalillutalu meeqqat inuusuttullu sammisaqartitsinitinni najuuttorivagut. Peqataasut ilaat ukiut pingasut tulleriisiinnarlugit peqataapput, maannalu ikinngutitik nassarlugit aamma peqataallutik, Susanne Andreassen Katuami ataqatigiissaarisuusoq taama oqaluttuarpoq.

knr.gl-ip Katuamut alakkaanerata nalaani balletimik misiliiniartut angajoqqaavi ilitsersuisuilu inersuarmi isersimasut naammattoorpagut. Meeqqallu nuannaaqisut 40-t missaanniittut balletip silarsuaanik misigisaqartussaapput.

-Tupinnaannarpoq taama mikitigisut taama periarfissinneqarneranni qanoq ilikkajatiginerat takullugu. Amerlanersaat balletsertartutut atisalersorsimapput, naak siornatigut balletimik misiliisimanngikkaluarlutik. Qularnanngilarlu pissarsiaqarluarlutik angerlarumaartut, Susanne Andreassen oqarpoq.

OuterVisioneqarnerani sammisassat amerlanersaat meeqqanut inuusuttunullu sammisassaapput. Unnuguli ukioqqortunerulaanut nalunaaqutaq arfineq pingasut qeqqaniit qulingiluat tungaanut inersimasunut qittatitsisoqassaaq.

-Naggasiinitsinni inersimasunut illugiilluni qititsitissaagut. Tamannalumi erinigisimaqaarput, qitinnermi balletertartuaqqanut hip hopertartunullu taamaallaat aaqqissuussaanngilaq. Unnugulu inersimasut qitinnerup nuannersortaa misigisussaassavaat. Piumasullu swingeriarlutik takkutiinnarsinnaapput. Piumasunut tamanut ammavoq, nuannaarlutillu takkuttut tamarmik inissaqarput, Susanne Andreassen naggasiivoq.