Otto Steenholdt nutaamik atuakkiorpoq
Nunatsinni ukiorpassuarni qinikkatut sulisimasoq Otto Steenholdt, ukiuni amerlasuuni naalakkersuinermut sunniuteqarsimaqaaq, aamma suli oqaasissaqartaannarpoq. Soorlu kingullermik Danmarkimi ministeriuneqarfiup Kinap præsidentiata ataatsimeeqatigineqarnissaanut atatillugu, Nunatsinni Naalakkersuisut qaaqquneqarsimannginnerat oqaaseqarfigaa.
Allattoq Martine Lind Krebs, Elisa Isaksen
juunip 14-at 2012 10:46
Otto Steenholdt eqqaamasalersaarumminik qallunaatut maanna atuakkioqqammerpoq, taaguutilimmik 'strejflys over mit liv', atuakkanik saqqummersitsisarfimmit Atuagkat-nit saqqummersinneqartumik. Atuagaq apriilimili saqqummersoq, Københavnimi Kalaallit Illutaanni aatsaat ippassaq ilasseqatigiinnikkut saqqummiunneqarpoq.
Atuagaq Otto Steenholdtip inuunerani pisimasunik tulleriiaaraluni oqaluttuartuunngilaq, pisimasulli pingaarutillit aamma inuit taassuma inuuneranut pingaaruteqarsimasut oqaluttuarineqarlutik.
Otto Steenholdt ilinniartitsisutut ilinniarsimasuusoq, parti pilersitseqataaffigisani, Atassut sinnerlugu Landsrådimut, Folketingimut, Inatsisartunullu ilaasortaasimavoq.
